საქართველოს ძიუდოს ფედერაციის ვიცე-პრეზიდენტი და კომპანია “ზედაზენის” სამეთვალყურეო საბჭოს თავმჯდომარე ცეზარ ჩოჩელი საქართველოს ძიუდოს ფედერაციაში განვითარებულ პროცესებს ეხმაურება და მხარეებს დიალოგისკენ მოუწოდებს.
შესაბამისი განცხადება ჩოჩელმა მედიაჰოლდინგ „კვირას“ პრესკლუბში გამართულ პრესკონფერენციაზე გააკეთა.
მისი თქმით, პროცესები, რომლებიც ფედერაციაში ვითარდება, არამხოლოდ სპორტის ამ სახეობის, არამედ სახელმწიფოსთვისაც დამაზარალებელია.
ამასთან, ჩოჩელის თქმით, 2015 წლიდან „ზედაზენი“ ძიუდოს ფედერაციის ოფიციალური სპონსორია და კომპანია აკონტროლებს მის მიერ გაღებული ხარჯების მიზნობრიობას.
„გული მტკივა იმ სპორტსმენებზე, რომლებიც ისეთ დაპირისპირებაზე გადავიდნენ, სადაც გამოსავლის ძებნა რთული ხდება. მე მინდა კიდევ ერთხელ მოვუწოდო ყველა მხარეს, რომ დავსხდეთ დიალოგისთვის. დარწმუნებული ვარ, რომ არანაირ ფინანსურ დარღვევას ადგილი არ ექნება. რადგან ჩვენს მიერ ხდება იმ თანხების კონტროლი, რასაც ძიუდოს ვახმართ. როგორ წარმოგიდგენიათ, ჩვენ ფულს ვიხდიდეთ ძიუდოს განვითარებისთვის და იქ ერთი, ორი ან თუნდაც ათი ადამიანი ცდილობდეს მის განკარგვას, არამიზნობრივად ხარჯვას და ჩვენ ამაზე თვალს ვხუჭავდეთ? – ეს არამც და არამც არ მოხდება. თითოეულ თეთრს ჩვენ ყოველთვიურად ვამოწმებთ, როგორ მიდის ამა თუ იმ პროგრამის განხორციელება რეალურად. აქედან გამომდინარე, არამიზნობრივი ხარჯვის თაობაზე გაჟღერებული ბრალდებები ვთვლი, რომ არასწორია. ყველაფერს რომ თავი დავანებოთ, შექმნილია სახელმწიფო კომისია, რომელიც ამოწმებს ამ ყველაფერს. შედეგები ჯერჯერობით არ დადებულა და ვფიქრობ, რომ მომავალ კვირაში, წესით უნდა დაიდოს“, – განაცხადა ჩოჩელმა.