კიდევ ერთი წარმატებული რეანიმაცია – ჩვენმა ექიმებმა 32 წლის მამაკაცი გადაარჩინეს, – ამის შესახებ ინფორმაციას თბილისის სასწრაფო სამედიცინო დახმარების ცენტრი ფეისბუქის საკუთარ გვერდზე ავრცელებს.
“თბილისის სასწრაფო სამედიცინო დახმარების ცენტრმა ელექტროტრავმის შედეგად დაზარალებული 32 წლის მამაკაცი გადაარჩინა. ყველაფერი კი 112-დან შესული შეტყობინებით დაიწყო – მორიგი გამოძახებიდან მობრუნებულ 0413 ბრიგადას 16 სთ-სა 57 წუთზე ოპერატორმა ახალი მისამართი გადასცა, გამოძახების მიზეზი კი ელექტროტრავმა იყო.
ადგილზე ექვს წუთში მისულ ბრიგადას ახალგაზრდა მამაკაცი უგონო მდგომარეობაში დახვდა. როგორც ექიმები იხსენებენ, პაციენტი არ სუნთქავდა და მაჯისცემა არ ესინჯებოდა. თვითმხილველებმა კი ექიმებს განუცხადეს, რომ ახალგაზრდა ბიჭი ელექტროსადენის გამოცვლას ცდილობდა, რა დროსაც დაშავდა და გონება დაკარგა. დაუყოვნებლივ დაწყებული სარეანიმაციო ღონისძიებების შედეგად გულის სინუსური რიტმი აღდგა და პაციენტის მდგომარეობაც დასტაბილურდა.
ბრიგადამ პაციენტი ქირურგიის ეროვნულ ცენტრში გადაიყვანა. 32 წლის მამაკაცი ამჟამად ექიმების მეთვალყურეობის ქვეშ რჩება.
თბილისის სასწრაფო სამედიცინო დახმარების ცენტრი პაციენტს სწრაფ გამოჯანმრთელებას უსურვებს!
(ბრიგადა 0413 – უფროსი ექიმი ნინო ჯალაბაძე, უმცროსი ექიმი თამარ რუხაძე, მძღოლი ჯიმშერ ამირანაშვილი)”, – წერია თბილისის სასწრაფო სამედიცინო დახმარების ცენტრის ინფორმაციაში.