რამდენიმე წუთის წინ “ნაციონალური მოძრაობის” წევრი, პარლამენტარი აზერ სულეიმანოვი პროკურატურაში ნიკა მელიასთან ერთად მივიდა. „ვიღაცამ ბიძინა ივანიშვილს აგინა და ნაციონალურ მოძრაობას ბრალდება“, – განაცხადა სულეიმანოვმა ჟურნალისტებთან.
დეპუტატმა პროკურატურაში შესვლამდე მედიასთან მომხდარი ინციდენტის შესახებ ისაუბრა. მისი თქმით ელჩინ ალახვერდიევი არასდროს ყოფილა “ნაციონალური მოძრაობის” წევრი და ყოველთვის მის წინააღმდეგ გამოდიოდა არჩევნების დროს. სწორედ ეს უთხრა დეპუტატმა, როდესაც მას მარნეულში “ნაციონალური მოძრაობის” ოფისში შეხვდა. სულეიმანოვის თქმით, ამის შემდეგ მათ შორის საუბარი არ ყოფილა, რადგან, მისი თქმით, „ვიღაცეები მოვიდნენ და წაიყვანეს“.
სოციალურ ქსელში გავრცელებულ ვიდეოში ასახული დანაშაულის ფარგლებში პროკურატურამ აზერ სულეიმანოვის მიმართ სისხლის სამართლებრივი დევნა დაიწყო.
ამავე საქმის ფარგლებში მძევლად ხელში ჩაგდების მუხლით უკვე დაკავებულია მარნეულის მერი, თემურ აბაზოვი.
ბრალი ასევე წარუდგინეს მარნეულის საკრებულოს წევრს “ქართული ოცნებიდან” რამინ ალახვერდიევს და აბაზოვის ნათესავს, ე.გ-ს. მათ გამოძიება ძალადობას ედავება.
გუშინ სოციალურ ქსელში გავრცელდა ვიდეო, სადაც ნაჩვენებია, როგორ დააკავეს აქციის ერთ-ერთი მონაწილე, მარნეულის მკვიდრი, ელჩინ ალახვერდიევი, ძალით მოაშარდინეს და შარდი სახეზე წაასმევინეს.