პრემიერმინისტრობის კანდიდატის მამუკა ბახტაძის თქმით, მომავალი თვიდან მეხანძრეების ხელფასი გაიზრდება. ამის შესახებ პარლამენტში სიტყვით გამოსვლისას განაცხადა.
„ეს ძალიან მნიშვნელოვანია. ეს არის ადამიანების ჯგუფი, რომლებიც 24 საათი დგას სადარაჯოზე. ისინი აკეთებენ ძალიან მნიშვნელოვანი რისკების პრევენციას ჩვენი ქვეყნისთვის და შესაბამისად, ჩვენ რა რესურსიც ახლა გამოძებნეთ, იმით ვაპირებთ და მათ შემდეგი თვიდან ხელფასი გაეზარდოთ“, – განაცხადა ბახტაძემ.
მანამდე შინაგან საქმეთა მინისტრობის კანდიდატმა გიორგი გახარიამ განაცხადა, რომ პირველი ივლისიდან 13 200 პოლიციელს ხელფასი გაეზრდება.
დღეს საპარლამენტო კომიტეტებმა პრემიერმინისტრობის კანდიდატ მამუკა ბახტაძის მიერ პარლამენტისთვის წარდგენილ მინისტრობის კანდიდატურებს მხარდაჭერა გამოუცხადეს. საკომიტეტო მოსმენების შემდეგ, კენჭისყრა გაიმართა, რომელზეც ყველა კომიტეტმა, ხმათა უმრავლესობით, პარლამენტში წარდგენილ მინისტრთა კაბინეტის განახლებულ შემადგენლობას მხარი დაუჭირა.
საკომიტეტო მოსმენების შემდეგ, შეხვედრები დეპუტატებსა და მინისტრობის კანდიდატებს შორის ფრაქციებში, კითხვა-პასუხის რეჟიმში გაიმართება.
20 ივნისს ქუთაისში პარლამენტის რიგგარეშე სხდომა გაიმართება, სადაც პარლამენტი მთავრობისთვის ნდობის გამოცხადების საკითხზე იმსჯელებს.
მამუკა ბახტაძე 14 ივნისს ქართულმა ოცნებამ პრემიერმინისტრობის კანდიდატად დაასახელა. გიორგი კვირიკაშვილმა პრემიერმინისტრის თანამდებობა 12 ივნისს დატოვა.