დარეჯან ლიპარტელიანი
პრემიერ-მინისტრ ირაკლი ღარიბაშვილის ამერიკაში გამგზავრების შემდეგ, საქართველოში პოლიტიკური მართვის სადავეები თითქოს „ნაციონალური მოძრაობის“ ხელში აღმოჩნდა. „ნაციონალური მოძრაობა“ და მისი მხარდამჭერი გუნდი ხელისუფლების საწინააღმდეგო პოლიტიკურ მოქმედებებსა და პიარგეგმაზე ზრუნვას, პრემიერ-მინისტრ ირაკლი ღარიბაშვილისა და მთავრობის წევრების ამერიკის შეერთებულ შტატებში ოფიციალური ვიზიტის პირველსავე დღეს შეუდგა.
პირველი, რაც „ნაციონალურმა მოძრაობამ“ ამერიკული ვიზიტის მნიშვნელობის დასაკნინებლად გააკეთა, ის იყო, რომ გიგა ბოკერიას ცოლის, თამარ ჩერგოლეიშვილის კუთვნილ ჟურნალ „ტაბულაში“ გამოქვეყნდა სტატია, სადაც საუბარი იყო „ისლამური სახელმწიფოს“ წინააღმდეგ კოალიციაში საქართველოს გაერთიანების რისკების შესახებ.
“ისლამური სახელმწიფოს” წინააღმდეგ კოალიციაში საქართველოს გაერთიანება რისკების შემცველი იქნება. ამის შესახებ ნათქვამია Foreign Policy-ში გამოქვეყნებულ სტატიაში – „საქართველომ აშშ-ს სირიელი მეამბოხეების საწვრთნელი ბანაკის განთავსება შესთავაზა”. “საქართველო ასევე ესაზღვრება ნატოს წევრ თურქეთს, რომელიც თავადაც მოექცა „ისლამური სახელმწიფოს” „ბოევიკების“ თავდასხმის ქვეშ. 11 ივნისს “ისლამურმა სახელმწიფომ” ერაყის ქალაქ მოსულში თურქეთის საკონსულო დაარბია, ტყვედ აიყვანეს 49 თანამშრომელი და მათი ოჯახის წევრები, რომლებიც 19 სექტემბერს გაუხმაურებელი გარიგების შედეგად გაათავისუფლეს”, – წერს ავტორი.
ამასთანავე, ჯონ ჰადსონი აღნიშნავს, რომ მიუხედავად საქართველოს შეთავაზებისა, საეჭვოა, საქართველომ მალევე მიიღოს ნატოს წევრობა, ან საერთოდ მიიღოს. მისივე თქმით, მთავარი დაბრკოლება ამ მხრივ ქვეყნის სეპარატისტულ რეგიონთან თანამშრომლობაა.
„2008 წლიდან მოყოლებული, საქართველოში შეჭრის შემდეგ ამ ტერიტორიებზე რუსეთის შეიარაღებული ძალები რჩებიან. ამან კი ჩრდილოატლანტიკურ ალიანსში აღძრა შიში, რომ საქართველოს ნატოში გაწევრიანებამ, შესაძლოა, ერთ დღეს ალიანსსა და რუსეთს შორის კონფრონტაცია გააძლიეროს მეხუთე მუხლის ფარგლებში, რომელიც ალიანსის ერთ-ერთ რომელიმე წევრ სახელმწიფოზე შეიარაღებული თავდასხმის შემთხვევაში, კოლექტიური თავდაცვის ზომების ამოქმედებას ითვალისწინებს”, – წერს სტატიის ავტორი.
ხსენებული სტატია „ტაბულამ“ დაბეჭდა და საქართველოს ხელისუფლება სეპარატისტებთან თანამშრომლობაში დაადანაშაულა. ყველა ტელევიზია და მათ შორის „რუსთავი 2“-ის საინფორმაციო გამოშვება „კურიერი“ სწორედ ამ თემით იწყებდა გამოშვებას და გავრცელებულ ინფორმაციას ისეთი აღშფოთებული ხმით გადმოსცემდა, თითქოს ქვეყანაში ომი დაიწყო.
ყველაფერი კი „ნაციონალურ“ ტელევიზიას იქით მიჰყავდა, თითქოს საქართველოში ბოევიკების ბაზა მართლა არსებობდა და მათი გაწვრთნაც რეალურად იგეგმებოდა.
როგორც საგარეო საქმეთა სამინისტრომ, ასევე თავდაცვის სამინისტრომაც ოფიციალურად განაცხადეს, რომ მსგავსი წვრთნები საქართველოში არ იგეგმება. მიუხედავად ამისა, „ნაციონალური მოძრაობის“ ლიდერები ჩვეული პათოსით, ჯიუტად ამტკიცებდნენ, რომ საქართველოს ხელისუფლება საშიშ თამაშში ჩაერთო და სეპარატისტებთან ფარულ გარიგებაში შევიდა. ამ ყველაფრის თავი და თავი,პრემიერის ამერიკაში ვიზიტის ხელის შეშლა იყო. ხსენებული ინფორმაციის გავრცელება პრემიერს ამერიკის და სხვა ქვეყნების პოლიტიკურ წრეებში პრობლემებს შეუქმნიდა.
არსებობს ინფორმაცია იმის შესახებ, რომ ხსენებული სტატია „ნაციონალური მოძრაობის“ ლიდერებმა მაშინ დაგეგმეს, როცა ისინი ვიზიტით ამერიკაში იმყოფებოდნენ.
„ექსკლუზივ ნიუსის“ ინფორმაციით, ხსენებული სტატიის გავრცელება პრემიერის ამერიკაში ვიზიტის დროს, გიგა ბოკერიამ ლობისტი ორგანიზაციების დახმარებით განახორციელა.
ცნობილი გახდა ასევე ისიც, რომ ინფორმაციის ასეთი მწვავე ფორმით გავრცელება„ნაციონალურ მოძრაობას“ სოლიდური თანხა დაუჯდა და ამ საკითხში მიხეილ სააკაშვილის ბიძა, თემურ ალასანია ერთ-ერთ „კასირად“ მოიაზრება.
ამ ჩანაფიქრის შედეგი კი ასეთია, „ნაციონალურმა მოძრაობამ“ საკუთარი მიზნების მისაღწევად, ქვეყნის ინტერესები გვერდზე გადადო და დეზინფორმაცია იმიტომ გაავრცელა, რომ საქართველოს ხელისუფლება დასავლეთს სეპარატისტების პარტნიორად აღექვა და მომავალში ჩვენს ქვეყანასთან ურთიერთობაზე უარი ეთქვათ. მოკლედ, „ნაციონალური მოძრაობის“ მიერ წამოწყებული სკანდალი, მხოლოდ ერთ იდეას ემსახურებოდა, როგორმე ამ თემით, მთავარი თემა გადაეფარათ, დაეკნინებინათ საქართველოს ხელისუფლების უმნიშვნელოვანესი ვიზიტი ამერიკის შეერთებულ შტატებში, სწორედ ამ ვიზიტისას დაიგეგმა რამდენიმე საყურადღებო „პროექტები“. თითქოსდა პირი შეკრა სამოქალაქო სექტორის რამდენიმე ცნობილმა პირმა: სწორედ ახლა გაახსენდა ყველას ციხეში არსებული მდგომარეობა; ასევე„ნაციონალური მოძრაობის“ აქტიურ მხარდამჭერ ახალგაზრდულ ორგანიზაცია„თავისუფალ ზონას“ ახლახანს შექმნილი ორგანიზაცია „თავისუფალი აზრი“დაუპირისპირდა; ასევე არასამთავრობო ორგანიზაცია „თავისუფალი თაობა“ ბაჩო ახალაიას სასამართლო პროცესზე შეიჭრა და ახალაიას მკვლელი ეძახა. აქ საგანგაშო თითქოსდა არაფერია, რადგანაც „თავისუფალი ზონის“ გაუქმება თუ თვითლიკვიდაციის გამოცხადება, რომელსაც „თავისუფალი თაობა“ ითხოვდა, ნამდვილად არ არის ალოგიკური. არც ის არის რეალობას მოკლებული, რომ ახალგაზრდებმა ბაჩო ახალაის მკვლელი ეძახეს.
ამ ყველაფრის შედეგი ასეთია: დაკავეს 12 ახალგაზრდა, ამ ფაქტმა საზოგადოების ყურადღება მიიპყრო, მაგრამ როცა ებრძვი მანკიერებას და ამის გამო ითხოვ „თავისუფალი ზონის“ გაუქმებას, რადგანაც ისინი საზოგადოებაში „ნაციონალური მოძრაობის“ ქვეგანყოფილებად აღიქმებიან. თუკი შენ,„თავისუფალ თაობას“ მეტი ბერკეტები და ბრძოლის უნარი არ გაგაჩნია, მაშინ რაღა აზრი აქვს ამ ყველაფერს? შეიძლება გაუთვითცნობიერებლად, მაგრამ მაინც ისევ „თავისუფალი ზონის“ პოზიციების გამყარება მოხდა და ხმაურიანმა დაკავებამაც, გარეგნულად ასეთი შთაბეჭდილება დატოვა.
გაეროში კლიმატის სამიტზე პრემიერ-მინისტრ ირაკლი ღარიბაშვილის სიტყვით გამოსვლამ, წარმატებით ჩაიარა. „თავისუფალი ზონის“ სკანდალმა მისი მნიშვნელობა მართლა ვერ გადაფარა.
ყველაზე ამაზრზენი და თვალში საცემი იყო ნაციონალური ტელეარხების პოზიცია, რომლებიც საინფორმაციო გამოშვებებში მე-19-ე, ან 21-ე წუთზე აჩვენებდნენ ამერიკაში ხელისუფლების ვიზიტის, პრემიერ-მინისტრ ღარიბაშვილის სიტყვით გამოსვლის სიუჟეტს, თითქოს ეს ქვეყნისთვის არცთუ მნიშვნელოვანი საკითხი ყოფილიყო.
მიუხედავად ტელევიზიების აქტიური მცდელობისა – დაეკნინებინათ ამერიკაში პრემიერის ვიზიტის მნიშვნელობა – ვერ მოხერხდა.
მოკლედ, ნაციონალების ძალისხმევა, რომელიც მიმართული იყო ქვეყნის წინსვლის შეფერხებისა და დაკნინებულად წარმოჩენისათვის, კრახით დასრულდა. მსოფლიო მნიშვნელობის სამიტი, რომელიც ამერიკაში მიიმდინარეობს, ჩვენი ქვეყნის წინსვლისა და წარმატების საწინდარია. გიგა ბოკერია, თემურ ალასანია და მათი იდეების გამავრცელებელი ტელევიზიები, იმ დეზინფორმაციის ტირაჟირებით, თითქოს საქართველოში ისლამური სახელმწიფოს წინააღმდეგ ბოევიკების საწვრთნელი ბაზები იქმნება, – ვერაფერს მიაღწევენ. როგორც კონფიდენციალური წყარო „ექსკლუზივ ნიუსთან“ საუბარში აცხადებს: გიგა ბოკერიამ და თემურ ალასანიამ საქართველო ტერორისტების სამიზნე გახადეს და ამაში უცხოურ ლობისტურ ორგანიზაციებს სოლიდური თანხა გადაუხადეს.
ამერიკულმა გამოცემა Foreign Policy -მ 23 სექტემბერს გამოქვეყნებული სტატია განაახლა. “საქართველოსა და აშშ-ის ხელისუფლების ოფიციალურ პირთა განცხადებით, ეს ინიციატივა, რომელიც პირველად გამოქვეყნდა Foreign Policy-ში, ქართულმა მხარემ სექტემბრის დასაწყისში, თბილისში ვიზიტით მყოფ აშშ-ის სახელწიფო მდივან ჩაკ ჰეიგელს შესთავაზა. პენტაგონი განიხილავდა შეთავაზებას, თუმცა მას შემდეგ, რაც სამშაბათს ის გასაჯაროვდა და გამოიწვია განგაში პატარა კავკასიური ქვეყნის უსაფრთხოებასთან დაკავშირებით, ქართველმა ოფიციალურმა პირებმა ეს შეთავაზება უარყვეს”, – ნათქვამია ამერიკული გამოცემის განახლებულ სტატიაში.
“ამისგან განსხვავებით, საქართველოს თავდაცვის სამინისტროს არ უარყვია შეთავაზების არსებობა და გაავრცელა განცხადება, სადაც ნათქვამია, რომ საქართველო განიხილავს, თუ რა ფორმით მიიღებს მონაწილეობას (ISIS) ტერორიზმის წინააღმდეგ (ISIS) კოალიციის მიზნების მიღწევაში”, – ნათქვამია განახლებულ სტატიაში.
მოკლედ, „ნაციონალური მოძრაობის“ მკვდრეთით აღდომის მსურველთა საყურადღებოდ, ერთი რამ შეიძლება ითქვას, რომ Foreign Policy -ს მიერ გამოქვეყნებული სტატია, ვერანაირად მოახერხებს იმ მიცვალებული პოლიტიკური ძალის გაცოცხლებას, რომელსაც „ნაციონალური მოძრაობა“ დამიხეილ სააკაშვილი ჰქვია. მთავარია, საზოგადოება არ აჰყვეს პროვოკაციებს და ქვეყნის განვითარებაზე ზრუნვა, პირად ინტერესებსა და ამბიციებზე მაღლა დააყენოს. ქვეყნის განვითარებას ვერც გიგა ბოკერიას შადიმანური მოქმედება და ვერც თემურ ალასანიას მიერ გაღებული თანხები ვერაფერს დააკლებს.