ვანის მუნიციპალიტეტში მცხოვრებ მამაკაცს, რომელსაც კორონავირუსი გუშინ დაუდასტურდა, საკუთარი მაღაზია ქვეყანაში საგანგებო მდგომარეობის გამოცხადების შემდეგ არ გაუღია, შესაბამისად, მას არ ჰქონდა კომუნიკაცია მომხმარებელთან, – ამის შესახებ საქართველოს პირველ არხს ვანის მუნიციპალიტეტის საზოგადოებრივი ჯანდაცვის ცენტრის ხელმძღვანელმა, გიგა ბუაძემ განუცხადა.
მისივე თქმით, კორონავირუსით ინფიცირებული მამაკაცის კონტაქტები უკვე მოძიებულია.
„ინფიცირებული ქალბატონის მეუღლეს, რომელსაც „კოვიდ-19“ თავადაც დაუდასტურდა, სამშენებლო პროდუქციის მაღაზია აქვს, რომელიც დაიკეტა მყისიერად საგანგებო მდგომარეობის გამოცხადებისთანავე. მამაკაცს ზუსტად ის საკონტაქტო წრე ჰყავს, რაც მის მეუღლეს, ამიტომ კონტაქტების იდენტიფიცირება არ გაგვიჭირდა“, – განაცხადა ბუაძემ.
ამ დროისთვის ვანის მუნიციპალიტეტში თვითიზოლაციაში 31 მოქალაქე იმყოფება. ერთმა პირმა კი საკუთარი ნებით საკარანტინო სივრცეში გადასვლა ითხოვა და ის წყალტუბოში, სასტუმრო „პლაზაშია“ გადაყვანილი.