მეტროსადგურების: „ვარკეთილსა“ და „ავლაბარის“ სარეკონსტრუქციო-სარეაბილიტაციო სამუშაოების პროექტირებაზე ხელშეკრულებებია გაფორმებული, – ამის შესახებ თბილისის მერმა, კახა კალაძემ დედაქალაქის მთავრობის სხდომაზე განაცხადა.
კახა კალაძემ თბილისის მეტროპოლიტენის სადგურების რეაბილიტაციის აუცილებლობის შესახებ ისაუბრა.
„როგორც იცით, თბილისის მერია მეტროს რეაბილიტაციის პროექტს ახორციელებს, რომლის ერთ-ერთი უმნიშვნელოვანესი ნაწილი მეტროსადგურების რეკონსტრუქცია-რეაბილიტაციაა. დღეის მდგომარეობით, თბილისის მეტროს გააჩნია 23 სადგური, რომელთა უმრავლესობასაც გახსნის დღიდან (დაახლოებით, 40-50 წელი) კაპიტალური სარემონტო სამუშაოები არ ჩატარებია, რის გამოც, მათ მნიშვნელოვანი განახლება ესაჭიროება, ასევე, მათი ტექნიკური მდგომარეობისა და იერსახის თანამედროვე სტანდარტებთან შესაბამისობაში მოყვანა“, – განაცხადა კალაძემ.
მისივე თქმით, აღნიშნული მიმართულებით, დაწყებულია სამუშაოები მეტროსადგურებზე: „გოცირიძე“, „ვარკეთილი“ და „ავლაბარი“. მეტროსადგურ „გოცირიძეზე“ უკვე მიმდინარეობს სარეკონსტრუქციო-სარეაბილიტაციო სამუშაოები, რომლის შედეგადაც, სრულად განახლდება და გადაიხურება მოსაცდელი ბაქანი, ასევე, გარემონტდება მეტროს გარე ფასადი, ვესტიბიული და სამეურნეო სათავსოები.
სამუშაოების სახელშეკრულებო ღირებულება შეადგენს 1 მლნ აშშ დოლარს. სამუშაოები, რომელსაც საქართველოში აზერბაიჯანული კომპანია შპს „კაიზენის“ ფილიალი ასრულებს, 2021 წლის იანვარში დასრულდება.
რაც შეეხება მეტროსადგურ „ვარკეთილსა“ და „ავლაბარს“, გაფორმებულია ხელშეკრულებები სარეკონსტრუქციო-სარეაბილიტაციო სამუშაოების პროექტირებაზე. კონტრაქტორმა კომპანიებმა სადგურების განახლებული იერსახის წინასწარი ესკიზები უკვე წარმოადგინეს. ორივე სადგურზე დეტალური პროექტირება მიმდინარე წლის ნოემბერში დასრულდება, რის შემდეგაც, დაუყოვნებლივ გამოცხადდება ტენდერები აღნიშნული სადგურების სარეაბილიტაციო სამუშაოებზე.
მეტროსადგურ „ვარკეთილის“ პროექტზე შპს TRIA Group მუშაობს, რომლის ღირებულებაც 90 000 ლარია. მეტროსადგურ „ავლაბრის“ პროექტს კი შპს „ვეგა+” ასრულებს, რომლის ღირებულება 145 000 ლარია.
ზემოაღნიშნულის გარდა, ევროპის რეკონსტრუქციისა და განვითარების ბანკთან (EBRD) მიღწეული იქნა შეთანხმება, რათა მათი ფინანსური მხარდაჭერით, დაახლოებით, ათი მეტროსადგურის რეაბილიტაცია/განახლება განხორციელდეს, რომელთა შორისაა: მ/ს „გურამიშვილი“; მ/ს „სადგურის მოედანი“; მ/ს „სარაჯიშვილი“; მ/ს „მარჯანიშვილი“; მ/ს „თავისუფლების მოედანი“; მ/ს „300 არაგველი“; მ/ს „რუსთაველი“; მ/ს „ისანი“; მ/ს „წერეთლის გამზირი“; მ/ს „ნაძალადევი“.
ამ ეტაპზე, სადგურების ტექნიკურ-ეკონომიკური კვლევისა და სარეაბილიტაციო სამუშაოების ტენდერის გამოსაცხადებლად საჭირო ტექნიკური დავალების შემუშავების მიზნით, მოსამზადებელი სამუშაოები მიმდინარეობს.