გორის საუნივერსიტეტო კლინიკისა და ხაშურის კლინიკის გარდა კოვიდპაციენტების სტაციონარულ მართვაში ქარელის ცენტრალური საავადმყოფოც ჩაერთო. დღეის მდგომარეობით, სამედიცინო ქსელ „გორმედის“ სამივე კოვიდკლინიკაში, 247 სტაციონარული პაციენტის მართვაა შესაძლებელი (გორში – 111, ხაშურში – 86, ქარელში – 50).
ამ დროისთვის, კოვიდკლინიკებში, ახალი კორონავირუსით ინფიცირებული 236 სტაციონარული პაციენტია მოთავსებული და იგეგმება კიდევ რამდენიმეს გადმოყვანა.
13-ის მდგომარეობა მძიმეა და ეს პაციენტები მართვით სუნთქვაზე იმყოფებიან. ბოლო 24 საათში 2 პაციენტი გარდაიცვალა, ორივეს თანმდევი დაავადებები აღენიშნებოდა.
სამედიცინო ქსელი „გორმედი“ ყოველდღიურად 350-მდე პაციენტს მართავს, აქედან ორი მესამედი კოვიდინფიცირებულია. რაც შეეხება ერთი თვის სტატისტიკას, 611 კოვიდინფიცირებული პაციენტის მართვა მოხდა, საიდანაც 345 უკვე გამოჯანმრთელდა.
პარალელურად, ფუნქციონირებს ონლაინკლინიკა, სადაც 8 ოჯახის ექიმი უწყვეტ რეჟიმში მუშაობს და დღე-ღამის განმავლობაში, 470-მდე პაციენტს უწევს კონსულტაციას.