ზოგადად, არ მჯერა ენჯეოების გაკეთებული საქმის ან ნაკლებად მჯერა. შესაბამისად, „ქართული ოცნება“, ჩემი აზრით, „სამართლიან არჩევნებთან“ მართალია. მეტიც, მათ გადააყენეს საკუთარი თავმჯდომარე, მაგრამ ეს არ არის საკმარისი იმ უხერხულობის აღმოსაფხვრელად, რომელიც რეალურად მათმა ქმედებამ გამოიწვია, – ამის შესახებ „გირჩის“ ერთ-ერთმა ლიდერმა, იაგო ხვიჩიამ განაცხადა.
„ერთადერთი, რაც მათ ამართლებს არის ის, რომ ჩვენ ზოგადად, ზედმეტ ყურადღებას ვაქცევთ არასამთავრობო ორგანიზაციების მიერ გაკეთებულ რაღაც კვლევებს თუ ანგარიშებს. მგონი, მაგას მაგდენი ყურადღება არ უნდა მივაქციოთ და რომ არ მიგვექცია, ნაკლებად დაიძაბებოდა სიტუაცია“, – განაცხადა ხვიჩიამ.
რაც შეეხება საგამოძიებო კომისიის შექმნას, იაგო ხვიჩიას თქმით, ის მსგავსი კომისიის შექმნის წინააღმდეგი არ არის.
„მე არ ვარ საგამოძიებო კომისიების წინააღმდეგი. ვფიქრობ, ეს კარგი გზა ჭეშმარიტების დასადგენად, მაგრამ ამას სჭირდება თავისი წესი და პროცედურები. თუ საგამოძიებო კომისიას აკეთებ შენ თვითონ, შენ თვითონ იძიებ, შენ თვითონ უდგენ სანქციებს საკუთარ თავს და თვითონ ასაჯაროებ, გამოდის ცნობილი რუსული გამონათქვამის არ იყოს, ბილეთებს რომ თვითონ ჰყიდი, თვითონ უკრავ და თვითონ ცეკვავ, რა დროსაც ძალას და აზრს კარგავს, რომ ამ პროცესს დავარქვათ საგამოძიებო კომისია, საგამოძიებო კომისია უნდა იქმნებოდეს სანდოობის და კონსესუსის საფუძველზე“, – განაცხადა ხვიჩიამ.
წყარო: 1tv.ge