„ქართული ოცნების“ პოლიტსაბჭოს შერჩევაზე ბევრი სპეკულაცია და ვერსიაა. ამ საკითხებზე ყრილობამდე არცერთი პარტია არ საუბრობს და ამიტომ ჩვენთვის გარკვეული უხერხულობაა, რომ მედიის კითხვებს ვერ ვუპასუხეთ, – ამის შესახებ „ქართული ოცნების“ ერთ-ერთმა ლიდერმა მამუკა მდინარაძემ ტელეკომპანია „იმედის“ გადაცემა „ქრონიკაში“ განაცხადა.
„ყრილობას ერთი კვირით ადრე წარედგინა „ქართული ოცნების“ პოლიტსაბჭოს წევრთა შემადგენლობა. ეს გადაწყვეტილება შესაბამისად ერთი კვირაა მიღებულია. 15-დან 21 წევრამდე იზრდება პოლიტსაბჭოს შემადგენლობა. მასში შედის თავმჯდომარე და 20 წევრი. შესაბამისად ჩვენ ამ ადამიანებს ავირჩევთ“, – აღნიშნა მდინარაძემ.
რაც შეეხება პოლიტსაბჭ”ოს წევრების შერჩევის კრიტერიუმებს, მამუკა მდინარაძემ განაცხადა, რომ ბევრი წევრი ამ პოზიციას შეინარჩუნებს.
„იყვნენ ადამიანები, ვინც თავად განაცხადა პოლიტსაბჭოს წევრობაზე უარი. მაგალითად დავით საგანელიძემ. ასეთი პოზიცია დააფიქსირა რამდენიმე ადამიანმა.ამიტომ ძალიან მშვიდად, წყნარად, მოგონილი დაპირისპირების გარეშე გადაწყვეტილება მივიღეთ. გავრცელდა ინფორმაცია, რომ კალაძესა და კობახიძეს შორის იყო დაპირისპირება. მსგავსი არაფერი მომხდარა, მოგონილი ამბების მძევალი ხდება საზოგადოება“, – აღნიშნა მდინარაძემ.
მისი თქმით, პოლიტსაბჭოში გენერალური მდივნის თანამდებობა არ უქმდება. „ოპონენტებს, როცა ყვითლად გასაყიდი არაფერი რჩებათ თავადვე იგონებენ ამბებს, რასაც ტირაჟირებას უწევენ მათი მედიასაშუალებები“, – აღნიშნა მდინარაძემ.