ჯანდაცვის მინისტრის მოადგილემ, თამარ გაბუნიამ, ჟურნალისტებთან საუბრისას, განმარტა, თუ მოქალაქეთა რომელმა კატეგორიამ ვერ მიიღო „ფაიზერზე“ რეგისტრაციის ჯავშნის შესახებ შეტყობინება.
„გუშინ, დღის ბოლომდე, 147 ათასამდე პირი დარეგისტრირდა. აქედან, ჯავშანი 142 195-ს დაუდასტურდა. 4 750 პირს ჯავშანი იქიდან გამომდინარე არ დაუდასტურდა, რომ მათი ნაწილი უკვე ვაქცინირებულია, ასევე, იყვნენ მოქალაქეები, რომელთაც, სხვადასხვა მიზეზის გამო, ჯერჯერობით, აცრის გაკეთება არ უწევდათ, თუმცა, მათ მაინც შეიყვანეს საკუთარი მონაცემები პორტალზე. დონაციით მიღებული ნახევარი მილიონი დოზიდან, ჩვენ გვაქვს საკმარისი მარაგი 240-250 ათასი მოქალაქის ასაცრელად. ეს ნიშნავს, რომ უკვე გამოტანილი დოზების გარდა, დასაჯავშნი დარჩა, დაახლოებით, 90 ათასი დოზა. ეს – ამ მიღებული დონაციიდან, თუმცა, მოკლე ხანში, ვაგრძელებთ დოზების მიღებას „ფაიზერთან“ პირდაპირი ხელშეკრულების ფარგლებში. ასე რომ, ეს დოზებიც შემოვა ქვეყანაში და ამის პრობლემა არ იქნება“, – აღნიშნა თამარ გაბუნიამ.