უკრაინელი სამხედროები გერმანიაში მიმდინარე აშშ-ის არმიის მასშტაბურ წვრთნებს შეუერთდნენ. ისინი ამერიკულ დანაყოფებს რუსეთთან ომის დროს დრონებისა და ელექტრონული ბრძოლის აღჭურვილობის გამოყენებისას სფეროში მიღებულ გამოცდილებას უზიარებენ.
ამის შესახებ „ასოშიეითიდ პრესი“ იუწყება.
ათამდე უკრაინელი სამხედრო მოსამსახურე გერმანიაში მიმდინარე წვრთნებში მონაწილეობის მისაღებად არის ჩასული. ისინი აშშ-ის სამხედრო პერსონალს დრონების გამოყენებით ომის წარმოებასა და ელექტრონული ბრძოლის საშუალებების მართვაში კონსულტაციას უწევენ და რეალური საბრძოლო მოქმედებების გამოცდილებას უზიარებენ.
წვრთნები გერმანიაში მდებარე პოლიგონზე მიმდინარეობს. აშშ-ის არმიის განცხადებით, მას დაახლოებით 1 ,900 დრონი აქვს, რომელთა გამოყენების ტაქტიკა რუსეთის წინააღმდეგ ომში უკრაინელი სამხედროების მიღებული უახლესი გამოცდილების საფუძველზე არის შემუშავებული.
სწავლებაში მონაწილე აშშ-ის ძირითადი ქვედანაყოფს 173-ე საჰაერო-სადესანტო ბრიგადა წარმოადგენს. აშშ-ის არმიის წარმომადგენელთა თქმით, იმიტირებულ მოწინააღმდეგესთან დაპირისპირების შემთხვევების დაახლოებით ნახევარში პირველი კონტაქტი სწორედ დრონების გამოყენებით მყარდება.
აშშ-ის არმიის სასწავლო დანაყოფის მეთაურმა გერმანიაში, ბრიგადის გენერალმა ტერი ტილისმა აღნიშნა, რომ უკრაინელი სამხედროები უშუალოდ ამერიკულ დანაყოფებთან მუშაობენ: წვრთნების დროს მათ რჩევებს აძლევენ, აგრეთვე ახალი ტექნოლოგიების ათვისებასა და მათ გამოყენებაში ეხმარებიან.
გარდა ამისა, მიმდინარე წლის დასაწყისში, ამერიკული ბრიგადის რამდენიმე სამხედრო მოსამსახურე უკრაინაში გაიგზავნა, რათა დრონების გამოყენებით ომის წარმოების უკრაინული გამოცდილება უშუალოდ ადგილზე შეესწავლათ. აშშ-ის არმია ხაზს უსვამს, რომ უკრაინული მოდელის უბრალოდ კოპირებას კი არ აპირებს, არამედ ცდილობს, მიღებული ცოდნა საკუთარ სტრუქტურასა და სამხედრო ოპერაციების წარმოების მეთოდებს მოარგოს.
https://suspilne.media/1402172-ukrainski-vijskovi-navcaut-armiu-ssa-sucasnoi-vijni-droniv-ap/