საფრანგეთის პრეზიდენტი, ემანუელ მაკრონი სუდანის პრემიერ-მინისტრისა და მთავრობის წევრების დაუყოვნებლივ გათავისუფლებას ითხოვს.
„საფრანგეთი მკაცრად გმობს სუდანში სახელმწიფო გადატრიალების მცდელობას. ჩვენს მხარდაჭერას ვუდასტურებ სუდანის გარდამავალ მთავრობას და პრემიერ-მინისტრისა და სამოქალაქო ლიდერების დაუყოვნებლივ გათავისუფლებას ვითხოვ“, – აღნიშნა საფრანგეთის პრეზიდენტმა.
სამხედროებმა სუდანის პრემიერ-მინისტრი, აბდალა ჰამდოკი უცნობ ადგილას გადაიყვანეს მას შემდეგ, რაც მან უარი განაცხადა სამხედრო გადატრიალებისთვის მხარის დაჭერაზე.
სუდანის ინფორმაციის სამინისტროს განცხადებით, სუდანის პრემიერ-მინისტრი, აბდალა ჰამდოკი სუდანელ ხალხს მოუწოდებს, მშვიდობიანი გზით წინააღმდეგობა გაუწიონ გადატრიალების მცდელობას და დაიცვან თავიანთი რევოლუცია.
სამხედროებმა სუდანის მთავრობის მაღალი თანამდებობის პირები დააკავეს. გავრცელებული ინფორმაციით, სამხედროებმა ინტერნეტზე წვდომა შეზღუდეს და ხიდები ჩაკეტეს.