10 ნოემბრიდან 10 დეკემბრამდე საქართველოს ხელოვანთა კავშირის ,,ხელოვანები მომავლისთვის” ორგანიზებით და საქართველოს კულტურის, სპორტისა და ახალგაზრდობის სამინისტროს ხელშეწყობით, საქართველოს ბავშვთა და ახალგაზრდული საგუნდო კოლექტივების პირველი ეროვნული კონკურსი ,,მომავლის ვარსკვლავები” ტარდება.
კონკურსი მიზნად ისახავს პანდემიის შედეგად დაზარალებული საგუნდო სექტორის პროფესიულ მხარდაჭერას, შემოქმედებით სტიმულირებას და სოლიდური საპრიზო ფონდით გუნდების ფინანსურ მოტივაციას.
შესარჩევ კონკურსში მონაწილეობას იღებენ ბავშვთა და ახალგაზრდული საგუნდო კოლექტივები მთელი საქართველოს მასშტაბით, სხვადასხვა ქალაქებიდან და რეგიონებიდან. მათ შორის საუკეთესოთა შერჩევა მოხდება კომპეტენტური ჟიურის მიერ, რომლის შემადგენლობაში არიან გუნდის სპეციალისტები, ცნობილი ქორმაისტერები და კომპოზიტორები. გრან–პრისა და საპრიზო ადგილების მფლობელთა გარდა, გამოვლინდებიან და დაჯილდოვდებიან საუკეთესო ქორმაისტერისა და კონცერტმაისტერის ნომინაციებში დასახელებულნი. ნომინანტებს გადაეცემათ სახელობითი ჯილდოები, ხოლო საპრიზო ადგილებზე გასულებს – სხვა პრიზებთან ერთად სოლიდური ფულადი პრემიები.
პროექტის ფარგლებში ჩატარდება უფასო მასტერ–კლასები, ლექცია–სემინარები და ღია გაკვეთილები გუნდებისა და ქორმაისტერებისთვის საქართველოს სამუსიკო და სახელოვნებო ქსელიდან.
,,მომავლის ვარსკვლავების” დასკვნითი საზეიმო გალა–კონცერტი და პრიზიორთა დაჯილდოების ცერემონია 5 დეკემბერს ,,არტ–ჰოლში” გაიმართება.