„ვფიქრობ, პატიმარ მიხეილ სააკაშვილთან დაკავშირებით საკითხი ამოწურულია, ის უკვე ჯანმრთელია”, – ამის შესახებ საპარლამენტო უმრავლესობის წევრმა, გურამ მაჭარაშვილმა განაცხადა.
მისივე თქმით, პატიმარი ექსპრეზიდენტის მენიუ საზოგადოებისთვის საინტერესო არ არის.
„ვფიქრობ, პატიმარ სააკაშვილთან დაკავშირებით საკითხი ამოწურულია, პატიმარი უკვე ჯანმრთელია. რამდენად გააგრძელებს ამ სამკურნალო დაწესებულებაში სასჯელის მოხდას, თუ გადაიყვანენ, ეს არის პენიტენციურ სამსახურსა და იმ ექიმებზე დამოკიდებული, რომლებიც დასკვნას დადებენ. პატიმარ სააკაშვილის მენიუ და მედიკამენტები – რას იღებს, საინტერესო არ არის საზოგადოებისთვის. რა ფსიქოტროპულ საშუალებებს იღებდა შემოპარვამდე და მის შემდგომ და ახლა რას იღებს, ეს უინტერესოა. პატიმარზე ზრუნავს შესაბამისი უწყება, გასაგებია, რომ მისი ექიმები ზრუნავენ მის ჯანმრთელობაზე, მაგრამ ჩვენ ამ პატიმრის გარდა, რომელსაც განსაკუთრებულად მოვეპყარით, გვყავს ძალიან ბევრი პატიმარი და საზოგადოება, რომელიც მეტ ყურადღებას იმსახურებს დღეს”, – განაცხადა მაჭარაშვილმა.