მაშინ, როდესაც ტერიტორიული მთლიანობის პრობლემის წინაშე მდგარი ქვეყანა შეიძლება განიცდიდეს ობიექტურ სირთულეებს ნატოში გაწევრიანება-არ გაწევრიანების კუთხით, ბუნებრივია ეს კითხვა უფრო აქტუალურია სრულმასშტაბიან ომში გახვეული ქვეყნისთვის, – განაცხადა ვიქტორ ყიფიანმა „ქრონიკასთან“, რითაც უპასუხა კითხვას – „არის თუ არა მოსალოდნელი უკრაინასთან დაკავშირებით, რომ კონკრეტული გადაწყვეტილება იყოს მიღებული ალიანსის ეგიდით“.
„მე მგონია უკრაინის ომმა ნატოს გაფართოებისკენ აღმოსავლეთისკენ, განჭვრეტად მომავალში ფაქტობრივი ზღუდე აღმართა. ეს შესაძლოა არცთუ სასიამოვნო დასკვნაა, მაგრამ რეალისტური და მართალია. თუ არა ნატოს ფორმალური გაფართოება, რა შეიძლება იყოს საკომპენსაციო ფორმულები ჩვენი უსაფრთხოების ზრდისა, ალბათ ამაზე უნდა იყოს საუბარი, როგორც ალიანსთან, ისე ალიანსის ცალკეულ წევრებთან. უსაფრთხოების თვალსაზრისით, რახან ჩვენი სამყარო დღეს ამოყირავდა და წესების ერთობლიობა უწესობის ერთობლიობას დაემსგავსა, ალბათ ჩვენც უფრო კრეატიულები უნდა ვიყოთ, ჩვენი ხედვები უნდა შევთავაზოთ, ჩვენი უსაფრთხოების ხვალინდელი დღე როგორ გვესახება. დღევანდელ პირობებში, მაპი არის ანაქრონიზმი და ეს არის მოსაცდელ ოთახში გაურკვეველი ვადით ქვეყნის ჩარჩენა – მე ვფიქრობ ეს მექანიზმები მოძველდა. მე მოლოდინში ვარ, რომ ნატო იპოვის საკმარის შემოქმედებითობას საკუთარ თავში და ჩვენც გაგვიხსნის ამით კარს“, – განაცხადა ყიფიანმა.