Amnesty International-ის უკრაინული ოფისის დირექტორმა ოქსანა პოკალჩუკმა 7-წლიანი მუშაობის შემდეგ ორგანიზაცია დატოვა, მას შემდეგ რაც Amnesty International-მა გამოაქვეყნა ანგარიში უკრაინის მიერ საერთაშორისო სამართლის ნორმების დარღვევის შესახებ.
პოკალჩუკის თქმით, მისი და ორგანიზაციის ხელმძღვანელობის ღირებულებები ერთმანეთს აღარ ემთხვეოდა.
„ეს არის კიდევ ერთი დანაკარგი, რომელიც ომმა გამოიწვია. ჩემი საყვარელი სამსახური, ცხოვრების 7 წელი, სამომავლო გეგმები, ხოლო ბოლო 5 თვის განმავლობაში – ერთგვარი მაშველი რგოლიც. ყველაფერი ემსხვერპლა ბიუროკრატიის და ენობრივი ბარიერის კედელს. იმედი მქონდა, რომ ყველაფერს გამოვასწორებდი და ანგარიში წაიშლებოდა, თუმცა მივხვდი, რომ ეს არ მოხდებოდა“, – აცხადებს პოკალჩუკი.
Amnesty International-მა თავის ანგარიშში განაცხადა, რომ უკრაინული ჯარი სკოლებსა და საავადმყოფოებში შეიარაღების განთავსებით და მშვიდობიანი მოსახლეობის სიცოცხლის რისკის ქვეშ დაყენებით საერთაშორისო სამართლის ნორმებს არღვევს. უკრაინის პრეზიდენტმა, ვოლოდიმირ ზელენსკიმ Amnesty International-ის შერჩევითი მიდგომა დაგმო და განაცხადა, რომ ორგანიზაცია ცდილობს ტერორისტული სახელმწიფოს ამნისტირებასა და აგრესორიდან მსხვერპლზე პასუხისმგებლობის გადატანას.