თუ უკრაინის მხარდაჭერა არის საქართველოს ევროკავშირში წევრობის წინაპირობა, მაშინ ხვალვე უნდა მიგვიღონ ევროკავშირში, – ამის შესახებ საპარლამენტო უმრავლესობის წევრმა გიორგი ხელაშვილმა „ქრონიკასთან“ განაცხადა.
„ოპოზიცია ხავსს ეჭიდება. ეს არის სასოწარკვეთილი მცდელობა, რომ სრულიად სხვა კონტექსტში და სხვაგვარად გაკეთებული განცხადება საქართველოზე გადმოიტანონ. უპირველეს ყოვლისა მინდა ვთქვა, რომ თუ უკრაინის მხარდაჭერა არის წინაპირობა საქართველოს ევროკავშირში წევრობის, მაშინ ხვალვე უნდა მიგვიღონ, ვინაიდან იშვიათია ქვეყანა, რომელიც თავისი შესაძლებლობის მიხედვით იმდენ მხარდაჭერას უწევს უკრაინას, როგორც საქართველო. მინდა აუცილებლად განვმარტო შოლცის განცხადება. ეს განცხადება დასავლეთ ბალკანეთის სამიტზე იყო გაკეთებული და შეგვიძლია დარწმუნებით ვთქვათ, რომ ერთი მხრივ მიემართებოდა სერბეთისა და მეორე მხრივ უნგრეთის პოზიციას. აქ შეკითხვებიც არ არსებობს და ვიმეორებ, ეს არის სასოწარკვეთილი მცდელობა, საქართველო მიაბან ამ განცხადებას. ყველაზე მეტად რაც ჩვენ გვაძლევს საფუძველს მიმდინარე პოლიტიკურ პროცესში, რომ მყარად ვიდგეთ და მოვითხოვოთ ევროკავშირის კანდიდატის სტატუსი და შემდგომ წევრობა, არის სწორედ ჩვენი ძალიან სწორი პოზიცია, დასავლური ორიენტაცია და უკრაინის მხარდაჭერა“,- აღნიშნა ხელაშვილმა.