გულფოსის ჩანჩქერის ტერიტორიაზე გაუჩინარებული ნიკა ბეგაძის ოჯახის წევრები ისლანდიიდან საქართველოში დღეს დაბრუნდებიან, – ამის შესახებ დანიის სამეფოსა და ისლანდიის რესპუბლიკაში საქართველოს სრულუფლებიანმა ელჩმა გიგი გიგიაძემ განაცხადა.ინფორმაციას ipn-ი ავრცელებს.
ისლანდიური მხარე 22 წლის ნიკა ბეგაძის სამძებრო ღონისძიებებს შესაბამის რეჟიმში აგრძელებს.
„ოჯახის წევრები დღეს უკვე საქართველოში ბრუნდებიან. ამ დროისთვის ახალი არაფერია. ისლანდიური მხარე აგრძელებს სამძებრო ღონისძიებებს შესაბამის რეჟიმში. ოჯახის წევრები, ვერ გეტყვით რატომ ბრუნდებიან, სავარაუდოდ, თავიდანვე ასე ჰქონდათ განსაზღვრული და ბილეთებიც ნაყიდი“, – განაცხადა გიგი გიგიაძემ.
დანიის სამეფოსა და ისლანდიის რესპუბლიკაში საქართველოს სრულუფლებიანი ელჩი გიგი გიგიაძე ნიკა ბეგაძის გაუჩინარების ვერსიებზე ვერ საუბრობს და აცხადებს, რომ ისლანდიის ოფიციალური სტრუქტურები საქმის მოკვლევას უწინდებურად უბედური შემთხვევის კვალიფიკაციით აწარმოებენ.
„ჩვენ გვაქვს კომუნიკაცია ისლანდიის ოფიციალურ სტრუქტურებთან, რომლებიც საქმის მოკვლევას კვლავინდებურად აწარმოებენ უბედური შემთხვევის კვალიფიკაციით. დანარჩენი დეტალების დადგენა, სავარაუდოდ, უკვე გამოძიების პრეროგატივაა და საქართველოს საელჩო ამ შემთხვევაში მეტს ვერაფერს გეტყვით“, – განაცხადა გიგი გიგიაძემ.