საპატრიარქოში არ ადასტურებენ, რომ რუსი დეპუტატი არტემ კავინოვი საქართველოში საპატრიარქოს მოწვევით იმყოფება.
როგორც მამა კახაბერ გოგოტიშვილმა ექსკლუზიურად „პრაიმტაიმს“ განუცხადა, დეპუტატი საქართველოში ტურისტული ვიზიტით იმყოფება და სავარაუდოდ ილიაობის დღესასწაულზე რუს სასულიერო პირებს ჩამოჰყვა.
„ეს დეპუტატი საქართველოში საპატრიარქოს მოწვევით არ გახლავთ. ტურისტულად თუ ვინმე ჩამოდის ჩვენ არაფერ შუაში არ ვართ. ასე ათასი ადამიანი შეიძლება ჩამოვიდეს. მე როგორც ვიცი, ეს ადამიანი მრავალჯერ ნამყოფია საქართველოში. მორწმუნე ადამიანია და საქართველოს სიწმინდეების მოსალოცად ჩამოვიდა. ამჯერადაც ჩამოსვლის მიზეზი სიწმინდეების მოლოცვა იყო. გუშინ დაემთხვა ილიაობა, რის გამოც ის საპატრიარქოში აღმოჩნდა. რუს სამღვდელოებასთან ერთად არის ჩამოსული“, – განაცხადა კახაბერ გოგოტიშვილმა.
მისი თქმით, დეპუტატი პატრიარქს არ შეხვედრია, ეს იყო საერთო მიღება, სადაც ბევრი ადამიანი მოდიოდა.
„ოფიციალური მიღება არ ყოფილა, მოდიოდნენ მლოცველი და მორწმუნე ადამიანები, რომლებიც პატრიარქს ულოცავდნენ დღესასწაულს ერისკაცებთან ერთად. იქ საერთოდ არ დაფიქსირებულა, რომ ის რუსი დეპუტატი იყო“, – განაცხადა კახაბერ გოგოტიშვილი.