ამ საქმეში ნარკოტიკების თემა არაფერ შუაში არ არის, ამის გამო კონფლიქტი არ მომხდარა, – ამის შესახებ ჟურნალისტებს „ქუჩის ბიჭების“ წევრის, ირაკლი ნოზაძის ადვოკატმა, ნიკა სადრაძემ ღუდუშაურის კლინიკაში ირაკლი ნოზაძის დაკითხვის შემდეგ განაცხადა.
ნიკა სადრაძის განმარტებით, ირაკლი ნოზაძე დაზარალებულის სტატუსით დაიკითხა.
„გამომძიებელს აინტერესებდა რა მოხდა რეალურად, რა ვითარებაში და როგორ მიიღო დაზიანებები. ირაკლი ნოზაძემ, როგორც დაზარალებულმა დეტალურად აღწერა როგორ, რა ვითარებაში და ვისი მხრიდან მოიიღო ის დაზიანებები, რის გამოც საავადმყოფოში აღმოჩნდა. ნარკოტიკულ საშუალებებზე კითხვა არ დასმულა, თუმცა, იყო საუბარი იმაზე თუ რა ტიპის ურთიერთობა იყო. ირაკლის პოზიციაა, რომ ამ საქმეში ნარკოტიკის თემა არაფერ შუაშია, ამის გამო კონფლიქტი არ მომხდარა. კონფლიქტი მოხდა ვალის გამო და შესაბამისად, აქედან წარმოიშვა შელაპარაკება, რის შედეგადაც ირაკლი ნოზაძემ მიიღო დაზიანებები.
მე არ ვიცი ბრალდებული რას ამბობს, დაზარალებულის სიტყვებით, ნარკოტიკების თემა აქ არაფერ შუაში არაა. ეს არის ჭორი და ალბათ ამ საქმის მისტიური და სკანდალური მხარე. მის მიმართ მომხდარია დანაშაულებრივი ქმედება, ბეწვზეა გადარჩენილი. ბრალდების მხარე ვალდებულია დაადგინოს ვინაა ამ ქმედებაში დამნაშავე. ამ საქმეს სხვა მხარე არ აქვს საერთოდ. მე ბრალდებულის ნათქვამს და მის ქმედებას ვერ შევაფასებ, რაში დასჭირდა ან ერთის თქმა, ან მომავალში თუ რაიმეს იტყვის რაში დასჭირდება”, – განაცხადა ადვოკატმა.