საქართველოს პრეზიდენტმა, გიორგი მარგველაშვილმა ყირგიზეთის რესპუბლიკის პრემიერ-მინისტრი მუჰამედკალი აბილგაზიევი მიიღო, რომელიც თბილისში პირველად იმყოფება და საქართველოს OGP-ის სამიტში მონაწილეობის მისაღებად ეწვია.
საქართველოს პრეზიდენტის ადმინისტრაციის ინფორმაციით, შეხვედრისას საუბარი შეეხო საქართველოსა და ყირგიზეთს შორის პოლიტიკური თანამშრომლობის გაღრმავებასა და სექტორული ურთიერთობების განვითარებას. პრეზიდენტი მიესალმა ყირგიზეთის პრემიერის პირველ ვიზიტს საქართველოში და აღნიშნა, რომ ეს განსაკუთრებულ მნიშვნელობას შეიტანს ქვეყნებს შორის ორმხრივი ურთიერთობების გაღრმავებაში.
მხარეებმა ოკუპირებულ ტერიტორიებზე შექმნილი მდგომარეობა და რეგიონში არსებული უსაფრთხოების გარემო მიმოიხილეს.
მხარეებმა განიხილეს მიმდინარე საერთაშორისო ეკონომიკური პროექტები და საქართველოსა და ყირგიზეთის პოტენციალი სავაჭრო-ეკონომიკური მიმართულებებით. მათ ასევე ისაუბრეს პროექტის „ლაპის ლაზური“ მნიშვნელობაზე, რომელიც, როგორც შეხვედრაზე აღინიშნა, ქვეყანას წარმოაჩენს, როგორც მნიშვნელოვან სატრანსპორტო და სავაჭრო დერეფანს ევროპასა და აზიას შორის.