გიორგი მარგველაშვილის ქმედებები აჭარის მთავრობის მეთაურის კანდიდატის საკითხთან დაკავშირებით არის ილუზიის შექმნის მცდელობა, თითქოს მან გადაწყვიტა ეს საკითხი, არადა გადასაწყვეტი არაფერი იყო, – ამის შესახებ საპარლამენტო უმრავლესობის წევრმა ზაზა გაბუნიამ განაცხადა.
მისი თქმით, აჭარის უმაღლესი საბჭოს 2/3-ს მმართველი პარტია წარმოადგენს და ასეთ ვითარებაში კონსულტაციებს, მხოლოდ ფორმალური დატვირთვა ჰქონდა.
„ჩვენი მოქალაქეების უმრავლესობამ ხმა 2016 წელს ჩვენს პოლიტიკურ გუნდს მისცა და ხალხის ნების შედეგად აჭარის უმაღლესი საბჭოს 2/3-ს სწორედ “ქართული ოცნება” წარმოადგენს, რაც ნიშნავს იმას, რომ ამ პირობებში კონსულტაციებს მხოლოდ ფორმალური დატვირთვა აქვს. შესაბამისად, პრეზიდენტის გადასაწყვეტი აჭარის მთავრობის მეთაურის კანდიდატი არ იყო. ყველა დასავლურ დემოკრატიაში, პრეზიდენტი წარადგენს იმ კანდიდატს, რომელსაც საკანონმდებლო ორგანოს უმრავლესობა შესთავაზებს. ამისთვის უბრალო უმრავლესობაც კი საკმარისი იქნებოდა, თუმცა აჭარის უზენაეს საბჭოში უმრავლესობა მისი შემადგენლობის 2/3-ია, რომელიც ერთ კანდიდატზე შეთანხმდა. პრეზიდენტს დამატებითი კონსულტაციების გამართვა იმ შემთხვევაში ექნებოდა აზრი, თუკი უმრავლესობას საკუთარი კანდიდატი არ ეყოლებოდა, ან ვერ ჩამოყალიბდებოდა ერთ კანდიდატზე. მარგველაშვილის ქმედებები ამ საკითხთან დაკავშირებით არის ილუზიის შექმნის მცდელობა, თითქოს მან გადაწყვიტა ეს საკითხი, არადა გადასაწყვეტი არაფერი იყო“, – განაცხადა ზაზა გაბუნიამ.
უმრავლესობის წევრის კომენტარს საქართველოს პარლამენტი ავრცელებს.