“NDI-ის დიდი პატივისცემა მაქვს, მაგრამ იმ მონაცემებს, რაც პოლიტიკურ ნაწილს ეხება, არ ვენდობი”

თვითონ NDI-ის დიდი პატივისცემა მაქვს, მაგრამ იმ მონაცემებს, რაც პოლიტიკურ ნაწილს ეხება, არ ვენდობი,- ამის შესახებ ჯანდაცვის კომიტეტის თავმჯდომარემ აკაკი ზოიძემ ჟურნალისტებს განუცხადა. როგორც აკაკი ზოიძემ აღნიშნა, ის, რომ NDI-ს პოლიტიკურ ნაწილში არ ენდობა, იმას არ ნიშნავს, რომ მაგალითად, ნატო-ს მიმართ მოსახლეობის აზრი არ აინტერსებს.
„საერთოდ NDI-ს კვლევებს თვალს ყურადღებით ვადევნებ ხოლმე, იმიტომ რომ ძალიან საინტერესო მონაცემები აქვთ, რაც არაპოლიტიკურ თემებს ეხება და ტენდენციის დაჭერა ძალიან საინტერესოა. თვითონ NDI-ის დიდი პატივისცემა მაქვს, მაგრამ იმ მონაცემებს, რაც პოლიტიკურ ნაწილს ეხება, არ ვენდობი, ისევე როგორც ხშირ შემთხვევაში ჩვენთან აღმოჩნდა ისე, რომ არც ერთი ორგანიზაციის პოლიტიკური ნაწილი, როდესაც იქ კვლევები ტარდება, არ არის ხოლმე იმ შედეგების ადეკვატური, რაც დგება. ეს ხდება წლიდან წლამდე, ყველა მთავრობის პირობებში, რაც იმას ნიშნავს, რომ პოლიტიკურ საკითხებზე მოსახლეობის აზრის კვლევას, ამ შემთხვევაში და იმ შედეგებს, აზრი არ აქვს – ეს ერთი, მაგრამ ეს იმას არ ნიშნავს, რომ არ ვენდობი და არ მაინტერესებს მაგალითად, მოსახლეობის დამოკიდებულება ნატოს მიმართ. დარწმუნებული ვარ, როგორც არის, აბსოლუტურად სწორად არის მოცემული. ის, რომ სამუშაო ადგილებია ნომერი პირველი პრობლემა, სიახლე რომ არ არის, ყველას გვესმის და ეს, როგორც ნომერი პირველი პრობლემა, 1993 წლიდან ნებისმიერ საზოგადოებრივი აზრის კვლევაში გამოდის”, – განაცხადა აკაკი ზოიძემ.