“მგონია, რომ სალომე ზურაბიშვილის პოზიცია საპრეზიდენტო სასახლესთან დაკავშირებით იყო ნათელი და მკაფიო”, – ამის შესახებ პარლამენტის იურიდიულ საკითხთა კომისიის თავმჯდომარემ ეკა ბესელიამ განაცხადა.
„ამ დღეების განმავლობაში ვაკვირდებოდი ცოტა უცნაურ, დროსა და სივრცეში ამოვარდნილ დებატებს ამ საკითხზე. საპრეზიდენტო არჩევნების დაწყების პირველ ეტაპზე დისკუსიის გადატანა და დიდი დროის დათმობა სასახლის თაობაზე არ მგონია რაციონალური იყოს. ძალიან მიკვირს, ნუთუ სხვა თემები დაილია, რომ სასახლის გარშემო გაჩაღდეს პოლემიკა კანდიდატების მხრიდან. მე მგონია, რომ სალომე ზურაბიშვილის პიზიცია იყო ნათელი და მკაფიო, რაც მან საპრეზიდენტო სასახლესთან დაკავშირებით თქვა
მგონია, რომ ჩვენ, „ქართულმა ოცნებამ” ამ თემაზე დიდი ხნის წინ დავასრულეთ დებატები. ჩვენ საკამათოდ და საპოლემიკოდ არ გაგვიხსნია ეს თემა. ვინც ამ თემით ცდილობს საპრეზიდენტო კამპანიის წარმართვას, მგონია, რომ მისთვის მთლად მომგებიანი არ უნდა იყოს. სასახლესთან დაკავშირებით ეს პოლემიკა უნდა დასრულდეს. ცოტა უხერხულია. ბევრი სხვა პრობლემა და გამოწვევაა, სასახლის სიბრჭყვიალით და მისი სიმდიდრით არ გაიზომება არც დამოკიდებულება და ბუნებრივია არც უფლებამოსილება, ასევე არც მანდატი. ამ სასახლესთან დაკავშირებული ემოციები, სენტიმენტები თუ სხვადასხვა გრძნობები, მოდით დავტოვოთ მათთვის, ვისაც ასეთი ემოცია აქვს. ეს არის ქვეყანა, სადაც განსაკუთრებით მნიშვნელოვანია ინსტიტუტების პატივისცემა და არამგონია, რომ ფუფუნებაზე, ბრჭყვიალა ნივთებსა თუ შენობებზე უნდა იყოს აქცენტები გადატანილი”, – განაცხადა ეკა ბესელიამ.
ეკა ბესელია იზიარებს პრემიერ-მინისტრ მამუკა ბახტაძის პოზიციას ავლაბრის სასახლის ხარჯებთან დაკავშირებთ.
„აბსოლუტურად ვიზიარებ პრემიერის შეფასებას. თავის დროზე ერთ-ერთი არგუმენტი, რაც ჩვენი მხრიდან გამოითქვა, იყო სწორედ ის, რომ ძალიან ბევრი, ზედმეტი, არასაჭირო ხარჯი აქვს იმ სასახლეს და არ არის რაციონალური. მაშინ როდესაც არსებობს ახლად აშენებული ოფისი ათონელზე, რომელიც ზუსტად მორგებულია ყველა იმ საჭიროებასა და სტანდარტს, რაც პრეზიდენტს უნდა ჰქონდეს”, – განაცხადა ეკა ბესელიამ.