დედამ ორი მცირეწლოვანი შვილი მოკლა – მომხდარის დეტალები

თბილისში, 32 წლის წინ, დედამ ორი მცირეწლოვანი ბავშვი ზეწრით გაგუდა და სამართალდამცველებს ჩაბარდა.
32 წლის წინ მომხდარის დეტალებზე გაზეთი „პრაიმტაიმი“ წერს.
გამოცემის ინფორმაციით, თბილისში, საბურთალოს რაიონის პოლიციაში 27 წლის ნ.მ მივიდა და განაცხადა, რომ 5 და 7 წლის საკუთარი ორი ვაჟი – მოკლა.
გამოცემის ინფორმაციით, თავიდან ლოთი ეგონათ, არ დაუჯერეს. შემდეგ მაინც მივიდნენ შემთხვევის ადგილზე და, მართლაც, აღმოაჩინეს ორი მცირეწლოვანი ბიჭის ცხედარი.
„პრაიმტაიმთან“ საუბრისას საქმის პროკურორი იხსენებს, რომ დღესაც არ ამოსდის თვალებიდან ბავშვები. მისი თქმით, უფროსი ვაჟი დედას ზეწრით ჰყავდა მომხრჩვალი. უმცროსს კი, ჩანდა, წინააღმდეგობა გაეწია. მას ყელზე დედის ფრჩხილებიც აჩნდა. პოლიციის მიერ გამოძახებული სასწრაფოს ექიმები მის გადარჩენას შეეცადნენ კიდეც, მაგრამ ვერ შეძლეს.
პროკურორი ყვება, რომ სამართალდამცველებმა იქაც აღმოაჩინეს დღიურში ჩანაწერები, რომელიც მუქარის დატვირთვას ატარებდა, – ნახე, რას გიზამო. კედელზე კი მაკრატლით იყო ამოჩხაპნილი: ხომ გადაგიხადე სამაგიეროო.
გამოძიებით გაირკვა, რომ ნ.ფ. და მისი მეუღლე, რომელიც ცნობილი აკადემიკოსის შვილიშვილი გახლდათ, ლანჩხუთის რაიონის ერთ-ერთ სოფელში ერთად იზრდებოდნენ. სკოლიდან უყვარდათ ერთმანეთი. თბილისში საცხოვრებლად გადმოსვლის შემდეგ ცოლი ქმარს ღალატში ადანაშაულებდა და მკვლელობის მოტივსაც ასე ხსნიდა. ამ საქმემ ცეკას პირველ პირებამდე მიაღწია და რეჟიმმა გადაწყვიტა, რომ, თუ ეს საქმე ასე შიშვლად გამოვიდოდა სააშკარაოზე, საზოგადოება ამ ქალთან იდენტიფიცირებას მოახდენდა და ეს დიდი სტრესი იქნებოდა მისთვის. ამიტომაც გადაწყვეტილება სულ ზევით მიიღეს, რომლის საფუძველზეც ბრალდებულს ექსპერტმა მკვლელობის დროს შეურაცხადობა დაუწერა. ქალბატონი დახვრეტას გადაურჩა, სამაგიეროდ, საზოგადოებაც გადაურჩა უმძიმეს შოკს. ბრალდებული ფსიქიატრიულში გაამწესეს და დაცვაც მიუჩინეს, ვინაიდან მას ორჯერ ჰქონდა თვითმკვლელობის მცდელობა.
როგორც „პრაიმტაიმმა“ გაარკვია, ეს ქალბატონი დღეს ცოცხალია, თუმცა მისი მეუღლე გარდაიცვალა. როგორც გვიყვებიან, ის დარდით გალოთდა. აღნიშნული ისტორია სოციალურ ქსელში მაგდა პაპიძის საქმის კონტექსტში გაჟღერდა. შემთხვევა 1984 წელს მოხდა.