„აკრძალული ხილის“ სინდრომის გაჩენა და ასეთი ბრძოლა, მხოლოდ რუსეთის წისქვილზე დაასხამს წყალს – პარლამენტის ვიცე-სპიკერი გია ვოლსკი მიიჩნევს, რომ სერგი კაპანაძის ინიციატივა, რუსული პროპაგანდის საკანონმდებლო დონეზე აკრძალვასთან დაკავშირებით, არასწორია.
„თანამედროვე ტექნიკის პირობებში პროპაგანდის აკრძალვის რესურსი არა მგონია, რომ არსებობდეს. მე არ მინდა, რაც მთავარია, ისე წარმოვადგინოთ ჩვენი თავი, საზოგადოება და მთავრობა, თითქოს რამოდენიმე ჟურნალისტის ჩამოსვლამ რუსული პროპაგანდის საფრთხის წინაშე დაგვაყენა და ტვინების გამორეცხვის საფრთხის წინაშე დააყენა საზოგადოება, რომლებმაც დამარხეს 200 სამხედრო და ამდენივე სამოქალაქო პირი. ვფიქრობ, „ნაციონალურ მოძრაობას“ და „ახალ ნაციონალურ მოძრაობას“ გარკვეული პასუხისმგებლობა აქვს იმასთან დაკავშირებით, რაც თავს დაგვატყდა. პროპაგანდის წინააღმდეგ ასეთი ბრძოლა, როდესაც არსებობს ტექნიკის ყველანაირი საშუალება, რომ ინფორმაციამ შემოაღწიოს, მხოლოდ რუსების წისქვილზე დაასხამს წყალს, ვინაიდან, შექმნის გარემოებას და იმ წარმოდგენას, თითქოს, ჩვენთან არსებობს ამ პროპაგანდის გავლენის საშიშროება. მე არ ვფიქრობ, რომ ეს სწორი გადაწყვეტილებაა. „აკრძალული ხილის“ სინდრომს ნუ გავაჩენთ საქართველოში და მეორეც, არ არის საქართველოში ის ადამიანი, რომელიც ვერ ხედავს, რომ ჩვენი ტერიტორიები ოკუპირებულია და თუ არის, ესა გარკვეული პოლიტიკური ჯგუფი, რომელიც გარკვეულ პოლიტიკურ ნიშას ეძებს და მას პოლიტიკურად უნდა ვებრძოლოთ და დავამარცხოთ,“ – განაცხადა გია ვოლსკიმ.