მოვედით, რათა პრეზიდენტს ვუთხრათ, როგორ ებრძვის ხელისუფლება დამოუკიდებელ ტელეკომპანიას,- ამის შესახებ ტელეკომპანია “იბერიას” საინფორმაციო სამსახურის ხელმძღვანელმა ვახო ხუზმიაშვილმა პრეზიდენტთან შეხვედრის დაწყებამდე ჟურნალისტებს განუცხადა.
მისი თქმით, შეხვედრები იგეგმება ასევე დიპლომატიური კორპუსის წარმომადგენლებთან. როგორც ხუზმიაშვილმა აღნიშნა, ხელისუფლებას დამოუკიდებელი ტელეკომპანიის დახურვა სურს.
“როცა ქვეყანაში პროკურატურას სძინავს, როცა ჟურნალისტურ საქმიანობაში ერევიან, როცა ხელისუფლება გამოდის და აი, ამ სისულელეს აპრავებს, ერთადერთი გზა, ვისაც შეიძლება შევჩივლოთ და ვისთანაც შეიძლება ჩვენი პრობლემა მივიტანოთ, ეს ქვეყნის პრეზიდენტია. მოვედით, რათა მას ვუთხრათ, როგორ ებრძვის ხელისუფლება დამოუკიდებელ ტელეკომპანიას. მას მივაწვდით ინფორმაციას და ვთხოვთ დახმარებას, რომ არ დაიხუროს ტელეკომპანია.
პირდაპირ ეთერში გავიდა ჩანაწერები და არ უნდა დაიწყოს პროკურატურამ გამოძიება? ამიტომ ვიძახი, რომ სძინავს.
ჩვენი მომდევნო შეხვედრა შედგება დიპლომატიური კორპუსის წარმომადგენლებთან. საქმეში ჩართულია სახალხო დამცველიც. ჩვენს გეგმაშია, რომ ღიად ვამხილოთ საქართველოს ხელისუფლება, როგორ ებრძვის დამოუკიდებელ ტელეკომპანიას,”- განაცხადა ხუზმიაშვილმა.
ამ წუთებში არხის თანამშრომლები ავლაბრის სასახლეში პრეზიდენტს ხვდებიან.