პარლამენტის თავმჯდომარის ირაკლი კობახიძის განცხადებით, მარიხუანას კულტივაციასთან დაკავშირებით საპატრიარქოსთან კონსულტაციები გაიმართება.
კობახიძის თქმით, მარიხუანასთან დაკავშირებით მთავრობის მიერ მომზადებული საკანონმდებლო პაკეტი ორ ნაწილად გაიყოფა.
როგორც კობახიძემ განმარტა, საკანონმდებლო პაკეტის ერთი ნაწილის განხილვა ცალკე მოხდება, რომელიც საქართველოში მარიხუანას მოხმარებასთან დაკავშირებით საკანონმდებლო რეგულაციებს აწესებს.
კობახიძის თქმით, მეორე ნაწილად მოხდება მსჯელობა კანაფის კულტივაცია, კანაფის პროდუქტების წარმოება-კულტივაციასთან დაკავშირებით მომზადებულ საკანონმდებლო ცვლილებებზე.
ირაკლი კობახიძე ამბობს, რომ საკანონმდებლო პაკეტის ორად გაყოფის მიზეზი საზოგადოებაში არსებული განწყობაა და ხელისუფლება შეეცდება, ცვლილებებთან დაკავშირებით დეტალური ინფორმაცია მიაწოდოს საზოგადოებას.
„მეორე ნაწილის განხილვა ჩვენ არ გვეჩქარება. მთავარია, საზოგადოება იყოს ინფორმირებული. კონსულტაციები საპატრიარქოსთან გაიმართება“, – განაცხადა ირაკლი კობახიძემ.