საპარლამენტო უმრავლესობის ლიდერის არჩილ თალაკვაძის განცხადებით, მარიხუანას წარმოებასთან დაკავშირებულ საკანონმდებლო პაკეტზე პარლამენტი გადაწყვეტილებას ყველა არგუმენტისა და საზოგადოებასთან პოზიციების შეჯერების შემდეგ მიიღებს.
თალაკვაძემ ჟურნალისტებთან საუბრისას ხაზგასმით აღნიშნა, რომ გადაწყვეტილება მხოლოდ კონსენსუსითა და საზოგადოებასთან ფართო შეთანხმებით იქნება მიღებული.
მისივე თქმით, პარლამენტის მხრიდან მაღალი მხარდაჭერა ექნება შს სამინისტროს მიერ მომზადებულ იმ საკანონმდებლო ცვლილებებს, რომლითაც მარიხუანას საჯარო სივრცეში მოხმარება იკრძალება და ამ მიმართულებით უსაფრთხოების ზომები მკაცრდება.
„ჩვენ ვხედავთ დასაბუთებულ საჭიროებას, რომ შემოვიდეს მკაცრი რეგლამენტაცია, როცა იქნება მკაცრი სანქციები მარიხუანას საჯარო მოხმარებაზე, მარიხუანას ზემოქმედების ქვეშ ავტომობილის მართვაზე, არასრულწლოვანების დაყოლიებაზე. ამ ქმედებების მკაცრ დასჯას პარლამეტი მხარს დაუჭერს“, – განაცხადა არჩილ თალაკვაძემ.
მარიხუანას თემაზე ორი – ერთმანეთისგან დამოუკიდებელი საკანონმდებლო პაკეტი პარლამენტის ბიუროს ინიცირებისთვის ხვალინდელ სხდომაზე წარედგინება.