იმ დროს, როდესაც “ნაციონალური მოძრაობის” მთავარი კომენტატორი მიხეილ სააკაშვილი ყვითელი განცხადებებით არის დაკავებული და ყოველ დღე ჩართვებს აკეთებს, საქართველოს პრემიერ-მინისტრი მამუკა ბახტაძე ამერიკის შეერთებულ შტატებში იმყოფება და მაღალი დონის სტრატეგიულ შეხვედრებს მართავს, – ამის შესახებ საპარლამენტო უმრავლესობის ლიდერმა არჩილ თალაკვაძემ განაცხადა.
„რა თქმა უნდა, მამუკა ბახტაძის ვიზიტი ემსახურება ამერიკისა და საქართველოს ურთიერთობების კიდევ უფრო განმტკიცებას. დარწმუნებული ვარ, რომ თუნდაც ეკონომიკური თანამშრომლობის თვალსაზრისით გვექნება კიდევ უფრო ფართო და სიღრმისეული თანამშრომლობა. საქართველოს უსაფრთხოების სამსახურთან დაკავშირებით სახელმწიფო დეპარტამენტის შეფასებას რაც შეეხება, საქართველო არის ამერიკის საიმედო მოკავშირე უსაფრთხოების თვალსაზრისით რეგიონში, როცა საქმე ტერორისტულ საფრთხეებს და რეგიონში უსაფრთხოებას ეხება. ეს არის ასახული ამ განცხადებაში. მოხარული ვარ, რომ ჩვენი პარტნიორები ამას სათანადოდ აფასებენ,“ – განაცხადა არჩილ თალაკვაძემ.