ბიძინა ივანიშვილი სწორედ ის ადამიანია, რომელმაც ჩვენს ქვეყანაში ელიტური კორუფციის დამარცხება უზრუნველყო. ეს ელიტური კორუფცია საქართველოში 2012 წლამდე ყვაოდა, – ამის შესახებ პარლამენტის თავმჯდომარემ ირაკლი კობახიძემ ტელეკომპანია „იბერიასთან“ და „ომეგა ჯგუფთან“ დაკავშირებით გავრცელებულ ჩანაწერებზე ჟურნალისტებს განუცხადა. მისი თქმით, ბევრი გვარი გაჟღერდა ამ საქმეში და გაჩენილ კითხვებს სამართალდამცველმა ორგანოებმა უნდა გასცეს პასუხი.
„ძალიან ბევრი გვარი გაჟღერდა ამ საქმეში. ჩვენი ამოცანაა ის, რომ სადაც კითხვა გაჩნდა, ჩავეძიოთ მათ და გავცეთ პასუხი. ბუნებრივია, ჩვენს ქვეყანაში კორუფციას არ დავუშვებთ. თუ სადმე არსებობს ოდნავი ეჭვი მაინც კორუფციასთან დაკავშირებით, ეს საქმე ჩასაძიებელია სამართალდამცავი ორგანობის მხრიდან. პარლამენტი, კომპეტენციის ფარგლებში ასევე დავინტერესდებით ამ საქმით. ყველა სათანადო ზომა უნდა იყოს მიღებული იმისათვის, რომ საქმეს მოეფინოს ნათელი,“ – განაცხადა ირაკლი კობახიძემ.
ჟურნალისტის კითხვაზე, შესაძლებელია თუ არა, რომ ამ საქმეში ბიძინა ივანიშვილის სახელიც ფიგურირებდეს, პარლამენტის თავმჯდომარემ უპასუხა, რომ ეს გამორიცხულია.
„ეს აბსოლუტურად გამორიცხულია. მე ვიცი ბატონი ბიძინას პრინციპები და საქმისადმი მისი მიდგომა. ბიძინა ივანიშვილი სწორედ ის ადამიანია, რომელმაც ჩვენს ქვეყანაში ელიტური კორუფციის დამარცხება უზრუნველყო. ეს ელიტური კორუფცია საქართველოში 2012 წლამდე ყვაოდა და სწორედ მისი პრინციპების წყალობით, ქვეყნის მმართველობა რადიკალურად შეიცვალა. ეს არის ბიძინა ივანიშვილისა და მისი პრინციპების დამსახურება,“ – განაცხადა კობახიძემ.
შეგახსენებთ, რომ ტელეკომპანია „იბერიას“ და „ომეგა ჯგუფის“ საქმეზე „რუსთავი 2“-მა რამდენიმე ფარული ჩანაწერი გაავრცელა, სადაც „ომეგა ჯგუფის“ წილების გადანაწილებაზეა საუბარი.