ხელისუფლებაში როცა იყვნენ ამას აკეთებდნენ, ახლა ოპოზიციაში არიან დღესაც იგივე ნაბიჯებს დგამენ, – ამის შესახებ საქართველოს პრემიერ-მინისტრმა მამუკა ბახტაძემ ტელეკომპანია „იმედის“ ეთერში აშშ-დან ჩართვისას განაცხადა.
ჟურნალისტის კითხვაზე, გრიგოლ ვაშაძის მხარდამჭერთა სიაში მამუკა ბახტაძის გვარი აღმოჩნდა, ეს ხომ არ გამოიწვევს იმას, რომ „ნაცმოძრაობა“ არჩევნების მიღმა დარჩეს, საქართველოს პრემიერმა განაცხადა, რომ ზოგიერთი ოპონენტი აგრძელებს უკანონო ნაბიჯების გადადგმას, ეს შეეხება გაყალბებას, სიცრუის ტირაჟირებას.
„ხელისუფლებაში როცა იყვნენ ამას აკეთებდნენ, ახლა ოპოზიციაში არიან დღესაც იგივე ნაბიჯებს დგამენ. ამას უნდა მოჰყვეს სამართლებრივი შეფასება და დარწმუნებული ვარ, შესაბამისი ორგანოები, ადეკვატურ შეფასებას გააკეთებენ, მაგრამ პოლიტიკურად ეს არის ღიმილისმომგვრელი. „ქართული ოცნება“ არის გარანტი იმისა, რომ საქართველოში ჩატარდება არჩევნები თავისუფალ გარემოში, დემოკრატიის უმაღლესი გარანტიის დაცვით.
როდესაც სხვადასხვა ოპოზიციური ძალა ასეთი ტიპის გაყალბებას, თვალში ნაცრის შეყრას იყენებს მექნიზმად, ეს შეუმჩნეველი არ რჩება საერთაშორისო საზოგადოების მიერ. ქართული საზოგადოებისთვის ეს სიურპრიზი არ იყო, ვინაიდან ამ ძალას ახასიათებს ასეთი უპასუხისმგებლო და მსგავსი ტიპის კანონდარღვევები. მე ვფიქრობ, როგორც საერთაშორისო, ისე ქართული საზოგადოებისთვის ყველაფერი ნათელია, რაც შეეხება სამართლებრივ შეფასებას, ამას შესაბამისი ორგანოები აუცილებლად გააკეთებენ კანონის შესაბამისად“, – განაცხადა მამუკა ბახტაძემ.