არჩილ თალაკვაძე: საქართველოს ექნება ბიზნეს-დავების სანდო და სწრაფი გადაწყვეტის მექანიზმი

შეთანხმება მიღწეულია – საქართველოს ექნება ბიზნეს დავების სანდო და სწრაფი გადაწყვეტის მექანიზმი – საერთაშორისო სავაჭრო პალატის არბიტრაჟი, – ამის შესახებ საპარლამენტო უმრავლესობის ლიდერმა არჩილ თალაკვაძემ განაცხადა.
მისი თქმით, ეს ნიშნავს მეტ ბიზნესს, მეტ ინვესტიციას, მეტ სამუშაო ადგილს.
“წარმატებით დასრულდა მოლაპარაკებები საერთაშორისო სავაჭრო პალატის საერთაშორისო საარბიტრაჟო სასამართლოსთან (ICC International Court of Arbitration) და საქართველოში საერთაშორისო სავაჭრო პალატის არბიტრაჟი დაფუძნდება. იუსტიციის მინისტრი თეა წულუკიანი მემორანდუმს ხელს 20 დეკემბერს, პარიზში მოაწერს. ეს არის მთავრობისა და ჩვენი ხელისუფლების კიდევ ერთი წარმატებული ნაბიჯი თანამედროვე, ღია და კონკურენტული ეკონომიკისთვის, რომელიც მოიზიდავს მეტ ინვესტორს, შექმნის ახალ სამუშაო ადგილებს. გეოპოლიტიკურ მდებარეობასთან ერთად, განვითარებული სამართლებრივი და ინსტიტუციური გარემო კიდევ უფრო მეტად ხდება ჩვენი ქვეყნის უპირატესობა”, – განაცხადა არჩილ თალაკვაძემ.