საქართველოს პარლამენტის თავმჯდომარემ, ირაკლი კობახიძემ ამერიკის შეერთებული შტატების სახელმწიფო მდივნის თანაშემწის ახალდანიშნულ მეორე მოადგილეს ევროპისა და ევრაზიის საკითხებში, ჯორჯ კენტს უმასპინძლა. მხარეებმა ორმხრივი ურთიერთობების შესახებ ისაუბრეს და თანამშრომლობის სხვადასხვა მიმართულებით კიდევ უფრო გაღრმავების შესაძლებლობები განიხილეს.
ყურადღება სტრატეგიული პარტნიორობისა და ამერიკის შეერთებული შტატების მხრიდან საქართველოს ევროატლანტიკური მისწრაფებების ურყევი მხარდაჭერის მნიშვნელობაზე გამახვილდა.
ირაკლი კობახიძემ და ჯორჯ კენტმა საქართველოში მიმდინარე დემოკრატიული რეფორმები მიმოიხილეს. ხაზგასმით აღინიშნა ამ პროცესში ქვეყნის უმაღლესი საკანონმდებლო ორგანოს როლი. მხარეებმა საპარლამენტო მუშაობის სამომავლო დღის წესრიგზეც ისაუბრეს, ასევე, მიმოიხილეს რეგიონული უსაფრთხოების საკითხები და დემოკრატიული პროცესების მნიშვნელობა რეგიონული მშვიდობის დამყარების პროცესში.
აშშ-ის სახელმწიფო მდივნის თანაშემწის მოადგილემ საქართველოს პარლამენტის თავმჯდომარეს ამერიკის შეერთებული შტატების მხრიდან ჩვენი ქვეყნის ტერიტორიული მთლიანობისა და სუვერენიტეტის, ასევე, დასავლური მისწრაფებების მტკიცე მხარდაჭერა აღუთქვა და მჭიდრო თანამშრომლობისთვის მზადყოფნა დაუდასტურა.
ირაკლი კობახიძემ ევროპისა და ევრაზიის საკითხებში აშშ-ის სახელმწიფო მდივნის თანაშემწის მოადგილეს უმასპინძლა
2018/10/13 14:09:42
ნანახია: 729 ჯერ