გისურვებთ, რომ დღეიდან თქვენ შეიტანოთ ღირსეული ღვაწლი საქართველოს და ნატო-ს შორის თანამშრომლობის გაღრმავებაში და ამ ქვეყნის თავისუფლების და ერთიანობის განმტკიცებაში, – ასე მიმართა ვიცე-პრემიერმა, შინაგან საქმეთა მინისტრმა გიორგი გახარიამ სანაპირო დაცვის დეპარტამენტის პირად შემადგენლობას ფოთის პორტში გამართულ ღონისძიებაზე.
როგორც გიორგი გახარიამ აღნიშნა, დღეს ორი მნიშვნელოვანი ღონისძიება იმართება – სანაპირო დაცვის დეპარტამენტის შექმნიდან 20 წლის იუბილე და ამერიკის შეერთებული შტატების მიერ საქართველოსთვის ორი ხომალდის გადმოცემა.
„დღეს ჩვენ აღვნიშნავთ ღირსშესანიშნავ დღეს და ვზეიმობთ ღირსშესანიშნავ ღონისძიებას. დღეს სრულდება 20 წელი სანაპირო დაცვის დეპარტამენტის შექმნიდან და დღეს ჩვენი სტრატეგიული პარტნიორის მიერ, ამერიკის შეერთებული შტატების მიერ გადმოეცემა საქართველოს „აილენდის“ კლასის ორი ხომალდი.
მე მინდა პირველ რიგში, სანაპირო დაცვის დეპარტამენტის პირად შემადგენლობას მივულოცო 20 წლის დაბადების დღე. ასევე მინდა გულწრფელი და დიდი მადლობა გადავუხადო ჩვენს სრატეგიულ პარტიორს, აშშ-ს მათი ღვაწლისთვის, რომელსაც ისინი ახორციელებენ ქვეყნის უსაფრთხოების, თავდაცვისუნარიანობის და განსაკუთრებით სანაპირო დაცვის მიმართულებით.
ჩვენ ძალიან კარგად გვესმის, რომ თქვენი მხარდაჭერის გარეშე რთული იქნება საზღვაო უსაფრთხოების დაცვა. ასევე მინდა ხაზი გავუსვა, რომ ჩვენ ერთმნიშვნელოვნად პირველ რიგში, ვულოცავთ ამ დღეს ოჩამჩირეს და დიოსკურიას პირად შემადგენლობას.
ძვირფასო მეგობრებო, გისურვებთ, რომ დღეიდან თქვენ შეიტანოთ ღირსეული ღვაწლი საქართველოს და ნატო-ს შორის თანამშრომლობის გაღრმავებაში და ამ ქვეყნის თავისუფლების და ერთიანობის განმტკიცებაში,“ – განაცხადა გიორგი გახარიამ.