19, 20 და 21 ოქტომბერს თბილისში „ნაციონალური მოძრაობის“ მიერ დაგეგმილი აქცია გადაიდო. ამის შესახებ პარტია „ერთიანი ნაციონალური მოძრაობის“ წევრმა და თბილისის მერობის ყოფილმა კანდიდატმა ზაალ უდუმაშვილმა განაცხადა.
მისივე თქმით, მათი პრეზიდენტობის კანდიდატი გრიგოლ ვაშაძე ამ დღეებში დასავლეთ საქართველოში იქნება.
„წინასაარჩევნო პერიოდში გეგმები იცვლება იმის მიხედვით, სად უფრო მნიშვნელოვანია პრეზიდენტობის კანდიდატის ყოფნა. ამ პერიოდში, ახლა ძალიან დიდი მოთხოვნა იყო, პრეზიდენტობის კანდიდატი დასავლეთ საქართველოში ჩასულიყო. ამიტომ, 19, 20 და 21 ოქტომბერს გრიგოლ ვაშაძე მთლიანად დასავლეთ საქართველოში იმყოფება – სამეგრელოში, იმერეთში და აჭარაში მართავს ძალიან დიდ შეხვედრებს. ამ შეხვედრების გამო გადაიდო ის აქცია, რომელიც იგეგმებოდა“, – განაცხადა ზაალ უდუმაშვილმა.
რამდენიმე დღის წინ ცნობილი გახდა, რომ „ნაციონალური მოძრაობა“ წინასაარჩევნოდ 100 000 კაციან მსვლელობას გეგმავდა.