”ბადრი პატარკაციშვილი სააკაშვილისთვის დიდ საფრთხეს წარმოადგენდა”

ბადრი პატარკაციშვილი სააკაშვილისთვის დიდ საფრთხეს წარმოადგენდა, რადგან ის 2007 წლის მოვლენებს დროს დიდი მხარდაჭერით სარგებლობდა, – ამის შესახებ პარლამენტის იურიდიულ საკითხთა კომიტეტის თავმჯდომარემ ეკა ბესელიამ ჟურნალისტებთან “პატარკაციშვილის საქმეზე” გავრცელებული ჩანაწერების თემაზე დასმული კითხვის პასუხად განუცხადა.
„ის სააკაშვილისთვის ძალიან საშიში იყო, რადგან მას ძალიან დიდი მხარდაჭერა ჰქონდა და მისი შესაძლო ლიკვიდაციის თაობაზე ინფორმაცია მალე გავრცელდა. კერძოდ, საუბარი იყო იმაზე, რომ პატარკაციშვილის თავიდან მოშორებას აპირებდნენ”, – ამბობს ბესელია.
საქართველოს პროკურატურამ განაცხადა, რომ ბადრი პატარკაციშვილის მკვლელობის მომზადების ფაქტი გაიხსნა. მთავარი პროკურატურის ინფორმაციით, სამსახურებრივი უფლებამოსილების გადამეტების და დამამძიმებელ გარემოებებში ჩადენილი მკვლელობის მომზადების ფაქტზე, დაკავებულია კონსტიტუციური უსაფრთხოების დეპარტამენტის თბილისის მთავარი სამმართველოს მეორე სამმართველოს პირველი სამსახურის ყოფილი უფროსი გიორგი მერებაშვილი, მეორე მთავარი სამმართველოს უფროსის ყოფილ მოადგილე ლევან ქარდავასა და ამავე სამმართველოს მეორე სამსახურის უფროს რევაზ შიუკაშვილს კი წარედგინათ ბრალდებები.
აგრეთვე, პროკურატურის ინფორმაციით, გიორგი დგებუაძე, კუდი-ს ყოფილი მაღალჩინოსანი, ადასტურებს, რომ პატარკაციშვილის მკვლელობის მომზადების საკითხი მიხეილ სააკაშვილის მიერ იყო სანქცირებული.