ზემო ფონიჭალაში, აფეთქების ადგილზე სამძებრო-სამაშველო სამუშაოები დასრულდა. ამის შესახებ საგანგებო სიტუაციების მართვის სამსახურის ხელმძღვანელის მოვალეობის შემსრულებელმა შალვა ხუციშვილმა განაცხადა.
როგორც შალვა ხუციშვილმა აღნიშნა, სამძებრო სამუშაოები ძალიან რთულ პირობებში მიმდინარეობდა.
„დასრულდა სამაშველო ღონისძიება. სამუშაოები ძალიან რთულ პირობებში მიდიოდა. კედლები იყო ჩანგრეული და ფილები ჩაცვენილი, ამის გამო, საკმაოდ გაგრძელდა პროცესი და მაშველები თავისი რისკის ფასად, ძალიან ფრთხილად მუშაობდნენ. ნაპოვნია გარდაცვლილი დედა-შვილი, რომლებიც გადაყვანილი არიან პროზექტურაში. მინდა, ოჯახს მივუსამძიმრო”, – განაცხადა შალვა ხუციშვილმა.
თბილისში, ზემო ფონიჭალაში აფეთქება საცხოვრებელ კორპუსში დღეს მოხდა. ამ დროისთვის არსებული ინფორმაციით, აფეთქება ბუნებრივი აირის დაგროვებამ გამოიწვია, რასაც საცხოვრებელი კორპუსის მე-3 და მე-4 სართულებზე ნგრევა მოჰყვა.