საქართველოს მთავრობის სხდომაზე დღეს საგანგებო სიტუაციების მართვის სამსახურის ორი საკითხი გადის. მინისტრთა კაბინეტი საგანგებო სიტუაციების მართვის სამსახურისთვის 30 ახალი სახანძრო მანქანის შეძენაზე იმსჯელებს. აღნიშნული მანქანები თბილისს მოემსახურებიან და მათი შეძენის შედეგად, დედაქალაქში სახანძრო ავტომობილების ავტოპარკი სრულიად განახლდება.
კიდევ ერთი განსახილველი საკითხია მოხალისეობის პროგრამა. ნებისმიერ მოქალაქეს, რომელსაც სურს, გახდეს მოხალისე, სპეციალურად შექმნილ პლატფორმაზე (volunteer.ge) დარეგისტრირება 5 დეკემბრიდან შეეძლება.
„პირველად იქმნება მოხალისეთა ეროვნული სია და მათ კოორდინაციას საგანგებო სიტუაციების მართვის სამსახური გაუწევს. მოხალისე შეიძლება გახდეს პირი, რომელსაც შეუსრულდა 18 წელი;
მოხალისე უნდა ფლობდეს ქართულ ენას საკომუნიკაციო დონეზე; მოხალისე არ უნდა იყოს ნასამართლევი განზრახ მძიმე დანაშაულისათვის;
მოხალისე უნდა იყოს საქართველოს მოქალაქე; მოხალისემ უნდა წარადგინოს ზუსტი ინფორმაცია მისი ჯანმრთელობის შესახებ, რათა არ მოხდეს მისი ჩართვა ისეთ მოხალისეობრივ საქმიანობაში, რომელიც შეიცავს მისი ჯანმრთელობის დაზიანების ან სიცოცხლის მოსპობის რისკს.
მოხალისეების გადამზადებას, ევროკავშირისა და აშშ-ს მხარდაჭერით, საგანგებო სიტუაციების მართვის სამსახური უზრუნველყოფს.
ახალი ვებ-პლატფორმა – mokhalise.ge მალე ამოქმედდება.
13 ივნისის ტრაგედიამ და მოქალაქეების ერთიანობამ დაგვანახა როგორ შეგვიძლია ერთმანეთის გვერდში დგომა. ამ მაღალმა სამოქალაქო აქტივობის და თანაგრძნობის ჟესტმა კიდევ ერთხელ დაგვარწმუნა, რა მნიშვნელობა აქვს კონკრეტული საგანგებო სიტუაციების დროს მოქალაქეების ერთიანობას.
შესაბამისად, სახელმწიფოს მიზანია, სურვილისამებრ, ყველა მოქალაქე იყოს მომზადებული, რათა საჭიროების შემთხვევაში სრული კოორდნიაციის პირობებში იმუშაონ მოხალისეებმა“, – აცხადებენ საგანგებო სიტუაციების მართვის სამსახურში.