“თუ სახელმწიფოს და მთავრობას უნდა გაყალბება, მაშინ ალბათ, პირველი ტური სხვანაირად დამთავრდებოდა”

თუ სახელმწიფოს და მთავრობას უნდა გაყალბება, მაშინ ალბათ, პირველი ტური სხვანაირად დამთავრდებოდა, – ამის შესახებ ჟურნალისტებს მმართველი გუნდის მიერ მხარდაჭერილმა პრეზიდენტობის კანდიდატმა, სალომე ზურაბიშვილმა განუცხადა.
ზურაბიშვილი წინასაარჩევნო გარემოს შესახებ არასამთავრობოების ანგარიშს გამოეხმაურა და აღნიშნა, რომ არჩევნების გაყალბება უნდა გამოირიცხოს.
„მე მგონი, რომ ეს არის ყველაზე ცუდი კამპანია, რომელიც მე მეხებოდა უშუალოდ და არაერთხელ გავაკეთე განცხადება და რატომღაც დასკვნები მაშინ არ იყო, რომ შეიძლებოდა ევროპული კამპანიის ჩატარება, მაგრამ რაც ეხება ლეგიტიმურობას და დემოკრატიულობას, მე მგონი, რომ ეს არის საქართველოს ისტორიაში, არ მიყვარს ეს სიტყვები, მაგრამ ერთ-ერთი ყველაზე დემოკრატიული. მეორე ტურმა აჩვენა, რომ არანაირი გაყალბება არ იყო, რადგან, თუ სახელმწიფოს და მთავრობას უნდა გაყალბება, მაშინ ალბათ, პირველი ტური სხვანაირად დამთავრდებოდა. არ არის გაყალბებული და მე ყოველთვის ვთვლიდი და დღესაც ვთვლი, რაც არ უნდა რთული იყოს, მეორე ტური არის ნიშანი დემოკრატიულობის და ჩვენ ასე გვაფასებს ევროპა და საერთაშორისო თანამეგობრობა“, – განაცხადა სალომე ზურაბიშვილმა.