მმართველი გუნდის მიერ მხარდაჭერილი დამოუკიდებელი საპრეზიდენტო კანდიდატი სალომე ზურაბიშვილი აცხადებს, რომ მნიშვნელოვანია ამომრჩეველმა გაიგოს, როგორ პრეზიდენტს ირჩევს. მან დაასახელა ის მიზეზი, თუ რატომ თვლის, რომ საქართველოსთვის დღევანდელ პირობებში ის საუკეთესო არჩევანია. ამის შესახებ მან გადაცემა “იმედის კვირასთან” ინტერვიუში ისაუბრა.
სალომე ზურაბიშვილის თქმით, პირველ რიგში პრეზიდენტს წარმომადგენლობითი ფუნქცია აქვს:
“პირველ რიგში ეს არის წარმომადგენლობითი პრეზიდენტი. არა პრეზიდენტი, რომელიც ჩართული იქნება უშუალოდ “პოლიტიკურ პოლიტიკაში”, არამედ რომელიც იქნება არაპარტიული ცხოვრების ნაწილი და სახელმწიფოებრივი საქმიანობის ერთ-ერთი მთავარი შემსრულებელი.
ამ ქვეყანას საზღვარგარეთ წარმომადგენელი სჭირდება. ჩვენ სწორედ ისეთ მდგომარეობაში და გარემოში ვართ, როდესაც ქვეყანას ყველა კუთხით სჭირდება წარმომადგენლობა. იმდენი მიმართულებაა, რომ ვერც საგარეო საქმეთა მინისტრი (რომელსაც თავისი უშუალო დანიშნულება აქვს) და ვერც მხოლოდ პრემიერმინისტრი ვერ შეასრულებენ ყველაფერ იმას, რასაც ჩვენ შეგვიძლია მივაღწიოთ გარეთ თუ ყველგან ვიქნებით. უნდა გამოვიყენოთ ყველა ფორმალური და არაფორმალური ქსელი, მაგალითად, ჩემ შემთხვევაში, ქალ ლიდერთა ქსელი, რომელიც დღევანდელ მსოფლიოში ძალიან ძლიერია”, – განაცხადა სალომე ზურაბიშვილმა.
პრეზიდენტობის კანდიდატმა დასძინა, რომ პრეზიდენტი ხელისუფლებასთან საზოგადოების წარმომადგენელიც უნდა იყოს.
“დღეს არა მხოლოდ ჩვენთან, არამედ მსოფლიოში არსებობს პრობლემა, რომელიც არის ხელისუფლებასა და საზოგადოებას შორის დიალოგისა და ურთიერთგაგების პრობლემა. ხელისუფლება ჩართულია თავის ყოველდღიურ საქმიანობაში, კრიზისის დაძლევაში და ა.შ. საზოგადოება კი ზოგჯერ თვლის, რომ ხელისუფლებას მისი ტკივილის, წუხილის არ ესმის. პრეზიდენტის როლი არის მედიატორობა, შუამავლობა და არბიტრი. ყველა შემთხვევაში, პრეზიდენტს უნდა ჰქონდეს სახელმწიფოებრივი მოვალეობის განცდა. დარწმუნებული ვარ, რომ ჩემი გავლილი წარსული სწორედ არის წარსული, რომელიც სახელმწიფოს უკავშირდება და არა რომელიმე პოლიტიკურ პარტიას. მე თუ რამე მინდა ამ ქვეყანაში და თუ რამისთვის დავბრუნდი, ეს ყოველთვის იმისთვის იყო, რომ სახელმწიფო დამოუკიდებელი იყოს, გაძლიერდეს, განვითარდეს, გახდეს უფრო ევროპული და რომ ეს სახელმწიფო უფრო დემოკრატიული იყოს”, – განაცხადა პრეზიდენტობის კანდიდატმა სალომე ზურაბიშვილმა “იმედის კვირასთან” ინტერვიუში.