ტელეკომპანია იმედის ეთერში გასული სიუჟეტმა აღწერა ბერი გაბრიელ სალოსის ქუჩაზე ჩატარებული სპეცოპერაციის დეტალები. გამოძიებამ დაადგინა თემირლან მაჩალიკაშვილის კავშირი ახმედ ჩატაევთან. სახლმწიფო უსაფრთხოების კონტრტერორისტული ცენტრის ხელმძღვანელის განცხადებით აღნიშნული სპეცოპერაციით ქვეყანამ თავიდან დიდი საფრთხე აირიდა.
„ძალიან დიდი საფრთხე ავიცილეთ თავიდან იქიდან გამომდინარე რომ ჩატაევი იყო ერთ ერთი ფიგურა რომელიც ჩვენს ხელთ არსებული ინფორმაციით და არამარტო ჩვენს ხელთ არსებული იფორმაციით, როგორც თურქეთის, ისე ევროპის ქვეყნების ტერიტორიაზე გეგმავდა ტერორისტული აქტების განხორციელებას.“- აცხადებს სუსის კონტრტერორისტული ცენტრის ხელმძღვანელი ირაკლი ჩიმაკაძე.
ბერი გაბრიელ სალოსის ქუჩაზე ჩატარებულმა საგამოძიებო მოქმედებებმა სახელმწიფო უსაფრთხოების სამსახურს ჩატაევის მოკავშირეების დადგენისა და დაკავების შესაძლებლობა მისცა.
„დაკავებული პირების საცხოვრებელი მისამართებიდან ამოღებულია დიდი რაოდენობით მტკიცებულებები იმის შესახებ, რომ აღნიშნული პირები დაკავშირებულები იყვნენ ტერორისტულ ჯგუფთან და ხელს უწყობდნენ მას სხვა და სხვა სახით. კერძოდ, ამოღებულია ვიდეო მტკიცებულებები, როგორც თემირლან მაჩალიკაშვილის ასევე მარგოშვილის და სხვების მობილური ტელეფონებიდან, სადაც დასტურდება რომ ყველამ იცოდა თუ ვინ იყვნენ ეს პირები, რომლებიც საქართველოში იმყოფებოდნენ. უშუალოდ მაჩალიკაშვილის ტელეფონში ნანახია ფოტო რომელზეც ასახულია სირიაში მყოფი ბორზიევი. გარდა ამისა, ვნახეთ გაზიარებები სპეცღონისძიების ჩატარების შემდგომ, როდესაც ისინი უგზავნიან გარდაცვლილი ტერორისტების სურათებს ერთმანეთს. ბერი გაბრიელ სალოსის ქუჩიდან ამოღებულია TBC ბანკის მიერ გაცემული რეგისტრაციის ფურცელი, სადაც ნათლად ჩანს რომ თემირლან მაჩალიკაშვილის სახელზე გახსნილია საბანკო ანგარიში.“-აცხადებს ირაკლი ჩიმაკაძე.
26 დეკემბერს, პანკისსა და თბილისში ჩატარებული სპეცოპერაციისას სულ 6 პირი დააკავეს. გამოძიებამ 2 – ს ბრალი ტერორისტული ორგანიზაციის წევრობის 4 – ს კი ტერორიზმის ხელშეწყობისთვის წარუდგინა. დახურული და ხმაურიანი სასამართლო განხილვების შემდეგ მათ სალოსის ქუჩაზე დაკავებულ ბორზიევთან ერთად სასამართლომ გამამტყუნებელი განაჩენი გამოუტანა. განაჩენის გამოცხადების შემდეგ დააკავეს ძებნილი რუსლან შავაძეც.
სახელმწიფო უსაფრთხოების სამსახურის მიერ გავრცელებული ოფიციალური ინფორმაციით სპეცოპერაციის დროს თემირლან მაჩალიკაშვილი ხელყუმბარის აფეთქებას ცდილობდა, რა დროსაც სპეცრაზმელმა ესროლა. მაჩალიკაშვილი მოგვიანებით საავადმყოფოში გარდაიცვალა. გაჩნდა კითხვები, ხომ არ გადაამეტა უფლებამოსილებას სპეცრაზმმა. ოჯახი კატეგორიულად გამორიცხავდა ამ ვერსიას, თუმცა გამოძიებამ დანაშაულებრივ ჯგუფთან მაჩალიკაშვილის კავშირის დამადასტურებელი მნიშვნელოვანი მტკიცებულებები მოიპოვა. ექსპერტიზა ჩაუტარდა ხელყუმბარასაც რომელზე დაფიქსირებული ანაბეჭდი პირის იდენტიფიცირებისთვის უვარგისი აღმოჩნდა. თუმცა ექსპერტიზამ ხელყუმბარაზე მაჩალიკაშვილის DNM აღმოაჩინა. მის ოჯახს არც ამ მტკიცებულებების სჯერა და თითქმის ერთი წელია სპეცოპერაციას სხვა და სხვა ფორმით აპროტესტებს.
საქმეში სატელეფონო ანძების დეტალური ამონაწერებიც დევს რომლის მიხედვითაც საქართველოში გადმოსვლის შემდეგ ჩატაევმა და მისმა თანამზრახველებმა პირველი ზარი სწორედ თემირლან მაჩალიკაშვილის სახელზე რეგისტრირებულ ნომერზე განახორციელეს. რის შედმეგაც 19 წლის ახალგაქზრდამ მამას დაურეკა.
მაჩალიკაშვილის ტელეფონს ექსპერტიზა ამერიკის შეერთებულ შტატებში ჩაუტარეს და აღადგინეს ყველა ფოტო და მიმოწერა ეს კი სპეცოპერაციამდე ორი დღით ადრე თემირლან მაჩალიაკშვილის მიმოწერაა ახალგაზრდა გოგონასთან რომელსაც ჩეჩნურ ენაზე ლათინური შრიფტით საკუთარ ზრახვებს უმხელდა.
ვიდეოჩანაწერების მიხედვით სპეცოპერაციისას გარდაცვლილმა თემირლან მაჩალიკაშვილმა მობილური ტელეფონები ჩატაევის საქართველოში შემოყვანამდე ცოტა ხნით ადრე შეიძინა. მაჩალიკაშვილის მობილურსა და სოციალურ ქსელში ატვირთული ფოტოები რომლითაც დგინდება რომ ის ჩატაევის დაკავებულ და ლიკვიდირებულ თანამზრახველებს იცნობდა. ფოტოებით დგინდება ისიც რომ მაჩალიკაშვილი ღიად უჭერდა მხარს ისლამურ სახელმწიფოს და მათ იდეალებს იზიარებდა.
„იმედის კვირამ“ მაჩალიკაშვილებისა და ახმედ ჩატაევის ნათესაური კავშირიც დადგინა. პანკისში ადასტურებენ რომ თემირლან მაჩალიკაშვილის დედა და ახმედ ჩატაევის სიდედრი ბიძაშვილები არიან. „იმედის კვირის“ ინფორმაციით თემირლან მაჩალიაკშვილს, ანატოლი ბერძენიშვილსა და რამაზ მარგოშვილს ჩატაევის საქართველოში არალეგალურად შემოყვანამდე ცოტა ხნით ადრე თანხა თურქეთიდან სწორედ ჩატაევის ძმის ცოლმა გადმოუგზავნა.
აღკვეთილი ტერაქტი და 8 მსჯავრდებული ასეთია სპეცოპერაციიდან ერთი წლის შემდეგ საქმის სამართლებრივი შედეგი. ექსპერტები ფიქრობენ რომ სალოსის ქუჩაზე ჩატარებული სპეცოპერაციით ქვეყანა მასშტაბურ ტერაქტებს გადაურჩა.