„თიბისი ბანკი“ არის ფინანსურად ძლიერი ინსტიტუტი, ერთიანი გუნდი, პატივს სცემს სახელმწიფო ინსტიტუტებს და კანონს. „თიბისის“ დაარსების დღიდან ჩვენს ღირებულებებს წარმოადგენს გამჭვირვალობა, პატიოსნება და კანონმორჩილება, – ამის შესახებ „თიბისი ბანკის“ დამფუძნებელმა მამუკა ხაზარაძემ დღეს გამართულ ბრიფინგზე განაცხადა.
როგორც მამუკა ხაზარაძემ აღნიშნა, „თიბისი ბანკმა“ გაასაჩივრა სასამართლოში 11 წლის წინანდელ საქმეზე გამოტანილი რეგულატორის გადაწყვეტილება და ელოდება მართლმსაჯულებას.
„მიუხედავად ამისა, ჩვენ მზად ვართ, დიალოგის რეჟიმში განვაგრძოთ ამ სიტუაციიდან ეროვნულ ბანკთან ერთად გამოსავლის ძიება, რათა თავიდან ავიცილოთ პოტენციური ნეგატიური ზეგავლენა ქვეყნის საინვესტიციო გარემოზე და ზოგადად საქართველოს ეკონომიკაზე. რაც შეეხება პროკურატურის გამოძიებას ფულის გათეთრების მუხლით, კატეგორიულად უარვყოფთ ასეთი ფაქტის არსებობას, ჩვენს მიერ გადაცემულია ყველა საჭირო დოკუმენტი შესაბამისი ორგანოებისთვის, რაც ცხადყოფს ასეთი დანაშაულის არარსებობს. ამასთანავე, მაღალი საჯარო ინტერესების გამო, გვინდა, აღვნიშნოთ, რომ ამ ფაქტზე ყველა მასალა გადაგზავნილია ჩვენ პარტნიორებთან, საერთაშორისო საფინანსო ინსტიტუტებთან. ჩვენ უკვე გვაქვს საერთაშორისო საფინანსო იურიდიული ფირმის „დენსტონსის“ დასკვნა, რომელშიც მკაფიოდ არის აღნიშნული, რომ ამ ტრანზაქციებს არათუ ფულის გათეთრებასთან, არამედ საბანკო რეგულაციის ინტერესთან კონფლიქტის მაშინდელი ნორმების დარღვევასთან კავშირი არ აქვს“, – განაცხადა მამუკა ხაზარაძემ.
მისივე თქმით, მზად არის, რომ საერთაშორისო იურიდიული კომპანიებს გადასცეს დასკვნა და ასევე 2007-2008 წლის კონკრეტული ტრანზაქციების შესახებ ინფორმაცია გაუზიაროს ყველა დაინტერესებულ მხარეს – პარლამენტის შესაბამის კომიტეტებს, არასამთავრობოებს, დიპლომატიური კორპუსის წარმომადგენლებს.
„მზად ვართ, საზოგადოების ინტერესებიდან გამომდინარე არჩეული იქნას თქვენს მიერ დასახელებული ადგილობრივი თუ უცხოური კომპანიები, ენჯეოები, საელჩოს წარმომადგენლები, სპეციალური კომისია, რომელსაც ჩვენ გადავცემთ ნებისმიერ ინფორმაცის და ნებისმიერ ამონაწერს იმ საკითხზე, რაზეც თქვენც შეგაწუხეთ და ჩვენც შეგვაწუხეს“, – განაცხადა მამუკა ხაზარაძემ.