სურამის ფსიქიატრიული დაწესებულების დირექტორი, სპარტაკ ბუკია, სოციალურ ქსელში ბულინგის მსხვერპლი გახდა. ფეისბუქ საზოგადოების ერთმა ნაწილმა მისი ფოტო გააშარჟა და შეურაცხმყოფელი კომენტარები დაწერა. როგორც ჟურნალისტი ვარლამ წიკლაური წერს, ამ ფაქტის გამო, სპარტაკ ბუკიას ჯანმრთელობის მდგომარეობა კიდევ უფრო დამძიმდა. ამჟამად ის ინგოროყვას კლინიკის რეანიმაციულ განყოფილებაშია. კლინიკაში ის მანამდე, მძიმე დიაგნოზით, სიმსივნის მე-4 სტადიით შეიყვანეს.
ვარლამ წიკლაური:
“მთელი დღე სოციალურ ქსელში დაატარებთ სურამის ფსიქიატრიული დაწესებულების დირექტორის, სპარტაკ ბუკიას ფოტოს. დიახ, ბატონებო, ეს არის ის ადამიანი, რომელმაც ბენეფიციარებისთვის ყველაფერი გააკეთა, რომ კარგ პირობებში ეცხოვრათ. დაახლოებით სამი თვის წინ, სურამში გაცივდა და ფილტვების ანთებაა დაემართა, მაგრამ მდგომარეობა უფრო მძიმე აღმოჩნდა, სიმსივნე! სამი თვეა ებრძვის ვერაგ დაავადებას და ძალიან დაუძლურდა. როდესაც გაიგო, რომ რეპორტაჟს ისევ ვამზადებდით დაწესებულებაზე, დაგვიკვაშირდა და გვითხრა, რომ უნდოდა მოეყოლა ყველაფერი, სურამის ფსიქიატრიულის რეაბილიტაციის შესახებ, რა გააკეთა და ასე შემდეგ! ბუნებრივია მივედი, იწვა ინგოროყვას სახელობის კლინიკაში, სიარული ძალიან უჭირდა, სინქრონის ჩაწერის დროს ისვენებდა, სუნთქვა უძნელდებოდა, მაგრამ მაინც მოახერხა ბევრი რამის თქმა. ახლა “დააქრიალებთ” მის ფოტოს და ქილიკობთ-ალბათ არ იცოდით, რა სჭირდა, ხომ? თავადაც აქვს სოციალური ქსელი და საკუთარი ფოტოები ნახა , შემდეგ ის საშინელი კომენტარები! სპარტაკის მდგომარეობა საღამოს დამძიმდა და რეანიმაციულ განყოფილებაში გადაიყვანეს! ეს ვართ, საზოგადოება!!!”