საქართველოს პრეზიდენტ სალომე ზურაბიშვილთან ერთად, გერმანიაში ოფიციალური ვიზიტით მყოფმა საქართველოს განათლების, მეცნიერების, კულტურისა და სპორტის მინისტრმა მიხეილ ბატიაშვილმა საქართველო-გერმანიის ერთობლივ თანამშრომლობაზე ისაუბრა, რის თაობაზეც საქართველოში მალე ახალი, უპრეცედენტო პროექტის პრეზენტაცია იგეგმება. ამის შესახებ ინფორმციას განათლების, მეცნიერების, კულტურისა და სპორტის სამინისტრო ავრცელებს.
მინისტრმა აღნიშნა, რომ გერმანიასთან თანამშრომლობით მუშაობა მიმდინარეობს პროექტზე, რომელიც პროფესიული განათლების კუთხით მთელ რეგიონში განსაკუთრებული იქნება. გარდა ამისა, განათლების თემაზე გაზაფხულზე მნიშვნელოვანი ფორუმი-კონფერენციის ორგანიზებაც იგეგმება.
„საქართველო და გერმანია განათლებისა და კულტურის კუთხით სრულიად ახალ საფეხურზე ავიდნენ და დღევანდელი შეხვედრებიც ხელს შეუწყობს, რომ ვისაუბროთ მეტ თანამშრომლობაზე. საქართველოში ანგელა მერკელის ვიზიტის შემდეგაც საკმაოდ გააქტიურდა მუშაობა, მათ შორის განათლების კუთხით. ძალიან ბევრი პროექტი უკვე მიმდინარეობს. გერმანულ მხარესთან საკმაოდ აქტიურად ვთანამშრომლობთ და ძალიან მალე ვიხილავთ პროექტს, რომელიც პროფესიული განათლების კუთხით არამარტო საქართველოში, არამედ რეგიონში იქნება განსაკუთრებული. ჩვენს უნივერსიტეტებთან კვლევების მიმართულებით გაცვლითი პროექტები უკვე მიმდინარეობს”, – განაცხადა ბატიაშვილმა.