საქართველოს პრეზიდენტი სალომე ზურაბიშვილი დღეს საქართველოს კათოლიკოს-პატრიარქს, ილია მეორეს შეხვდა.
საქართველოს პრეზიდენტის ადმინისტრაციის ინფორმაციით, სალომე ზურაბიშვილმა ილია მეორესთან ბოლო პერიოდში ევროპის ქვეყნებში განხორციელებული ვიზიტების შედეგები განიხილა.
„აღინიშნა ქართულ დიასპორასა და ქართველ სტუდენტებთან შეხვედრების მნიშვნელობა, ევროპელი პარტნიორების მიერ საქართველოს მიმართ გამოხატული მაღალი ნდობა და ამ ნდობის ჩვენი ეროვნული ინტერესებისთვის გამოყენების საჭიროება“, – აცხადებენ საქართველოს პრეზიდენტის ადმინისტრაციაში.
მათივე ცნობით, შეხვედრაზე ხაზი გაესვა ქართველოლოგიის, როგორც მეცნიერების მიმართულების გაძლიერებისა და განვითარების მნიშვნელობას.
შეხვედრას საქართველოს პრეზიდენტის ადმინისტრაციის უფროსი ლაშა ჟვანია და საპატრიარქო ტახტის მოსაყდრე, მიტროპოლიტი შიო ესწრებოდნენ.
