გაზეთი „კვირის პალიტრა“ ისლამური რესპუბლიკის ერთ-ერთი გავლენიანი მებრძოლის, პანკისელი მურად მარგოშვილის (მუსლიმ ალ შიშანი) ინტერვიუს აქვეყნებს. ალ შიშანი ამჟამად სირიაში ასადის რეჟიმის წინააღმდეგ იბრძვის და ერთ-ერთ გავლენიან დაჯგუფებას “ჯუნუდ აშ შამის” (“სირიის მებრძოლები”) მეთაურობს. აშშ-მ ის 2014 წელს საშიშ ტერორისტთა სიაში შეიყვანა. მარგოშვილი ჩეჩნეთში რუსეთის წინააღმდეგ იბრძოდა და როგორც ცნობილია მისი მოტაცება ФСБ-მაც სცადა.
მუსლიმ ალ შიშანი ინტერვიუში ჰყვება, რომ სირიაში მებრძოლთა გაწვრთნის მიზნით 2012 წელს ჩავიდა. თუმცა ადგილობრივი მებრძოლების გამოუცდელობის გამო, საბრძოლო მოქმედებებში ჩართვის გადაწყვეტილება მიიღო. მებრძოლის თქმით, მას კავკასიის ემირატის მთავარი ემირის თანამდებობის დაკავება არასდროს უფიქრია.
მარგოშვილი ისლამური სახელმწიფოს ერთ-ერთ, ყოფილ, ყველაზე გავლენიან წარმომადგენლ, პანკისის ხეობის მკვიდრ, თარხან ბათირაშვილთან ურთიერთობასაც იხსენებს და ჰყვება, რომ ხალიფატის გამოცხადების დროს მათი შეხედულებები ერთმანეთს არ ემთხვეოდა.
„ბათირაშვილს ხეობიდანვე დადებითი კუთხით ვიცნობდი. აქაც კავშირს ვინარჩუნებდით. როდესაც გაყოფა მოხდა ჩავედი მასთან და დიდხანს ვარწმუნებდი, რომ “ხალიფატი” არ იყო ის გზა, რომელიც ჩვენ თავიდან ავირჩიეთ და ამ სისასტიკეს არანაირი კავშირი არ ჰქონდა ისლამთან. სამწუხაროდ, ეს არჩევანი თარხანმა გამოუცდელობის გამო გააკეთა, როგორც თქვენ აღნიშნეთ, “ხალიფატის” “ხმამაღალი” სახელის გამო. რა თქმა უნდა, მხარს ვერ დავუჭერდი იმ სისასტიკეს, რომელსაც ისინი სჩადიოდნენ. ვფიქრობ, მათ მუსლიმები უფრო მეტი დახოცეს, ვიდრე მოწინააღმდეგეები,“- ამბობს მარგოშვილი
მუსლიმ ალ შიშანის სახელით ცნობილი მებრძოლი, ისლამური ხალიფატის მხრიდან საქართველოს წინააღმდეგ გაცხადებულ მიზნებზეც საუბრობს.
„ხალიფატმა” ასეთი მუქარებით მუსლიმებისა თუ არამუსლიმების წინააღმდეგ მთელი მსოფლიო აამხედრა და დღეს ვხედავთ ამ პოლიტიკის შედეგებს. დღემდე სადაც გამოჩნდებიან, ყველგან მტრობას აჩაღებენ, პირველ რიგში, მუსლიმებს შორის, შემდეგ კი ერთმანეთის სისხლსაც ღვრიან. ამიტომ ჩვენ არ გავდგებით განზე და ყველაფერს გავაკეთებთ მათ შესაჩერებლად. ვფიქრობ, საქართველოში მათ ძალიან ცოტა მუსლიმი თუ გაჰყვება.“- მუსლიმ ალ შიშანი.
პანკისის ხეობის მკვიდრი ე.წ. „ახმეტ ჩატაევის“ საქმეზეც საუბრობს და ჩატაევს შარიათის სამართლის დამრღვევად მიიჩნევს.
„ამ კაცმა დაარღვია მთავარი ემირის ბრძანება, რომელიც ამბობდა, რომ არაფერი უნდა გაკეთებულიყო საქართველოში ისეთი, რაც ჩვენს ურთიერთობას დააზიანებდა. ამ კაცმა დაარღვია შეთანხმება, რომლის დაცვა ყველა მუსლიმს ევალება, თუნდაც ის არამორწმუნესთან იყოს დადებული. ამით უმადურობა გამოხატა იმ ქვეყნის მიმართ, რომელმაც ის ერთ დროს ФСБ-ს, ფაქტობრივად, ხელიდან გამოჰგლიჯა. ჩატაევის მოქმედებას გამართლება არა აქვს,“- აცხადებს მუსლიმ ალ შიშანი „კვირის პალიტრისთვის“ მიცემულ ინტერვიუში.