„მეგონა, რომ ჩვენ ისტორიას ჩავაბარეთ ადეიშვილის სტილი, როდესაც ეროვნული ბანკი და პროკურატურა უნისონში მუშაობდა, უკან გვაბრუნებთ?“ – ასე მიმართა პარლამენტის წევრმა, ლევან გოგიჩაიშვილმა ეროვნული ბანკის პრეზიდენტს თიბისი ბანკის საქმეზე საუბრისას.
ლევან გოგიჩაიშვილმა კობა გვენეტაძეს მოსთხოვა დააზუსტებინა, რა საფუძვლით დაიწყო 2008 წელს განხორციელებული ტრანზაქციის შესწავლა და დეპუტატს აინტერესებს, თუ აქვს ეროვნულ ბანკს ანალოგიური მაგალითები, რომელზეც პროკურატურამ გამოძიება დაიწყო.
„ყველაზე მძიმე ამ შემთხვევაში, რაც ჩემთვის არის ამ ისტორიაში, არის რაღაც დეჟა ვუ წარსულში დაბრუნების. მეგონა, რომ ჩვენ ისტორიას ჩავაბარეთ ადეიშვილის სტილი, როდესაც ეროვნული ბანკი და პროკურატურა უნისონში მუშაობდა, უკან გვაბრუნებთ? გქონდათ თუ არა თქვენ რაიმე კონსულტაციები და შეხვედრები პრემიერ-მინისტრთან, შს მინისტრთან და იყო თუ არა თქვენ შორის კომუნიკაცია ამ საკითხთან დაკავშირებით, ეს ძალიან მნიშვნელოვანია,“ – განაცხადა გოგიჩაიშვილმა.