ვახუშტი ბაგრატიონის ხიდის სარეაბილოტაცი სამუშაოები დასრულდა. მთლიანად გამოიცვალა ხიდის საყრდენები, მოეწყო ასფალტის ახალი საფარი, რკინა-ბეტონის თვალმრიდები, სანიაღვრე სისტემა და ჰიდროიზოლაცია.
მოეწყო ახალი, თანამედროვე სტანდარტების განათების ქსელის სისტემა. პროექტის ფარგლებში დაგეგმილია ბურჯების ფილით მოპირკეთება, ხიდის ვიზუალის შესაცვლელად.
როგორც თბილისის მერმა აღნიშნა, ვახუშტის ხიდის მდგომარეობა, ავარიულობის თვალსაზრისით, არც თუ ისე სახარბიელო იყო, შესაბამისად, მისი რეაბილიტაცია მერიის პრიორიტეტებში პირველ ადგილზე იდგა.
„ვახუშტის ხიდზე ძირითადი სამუშაოები დასრულებულია და მოძრაობა ორმხრივად აღდგენილია. ხიდს სრული რეაბილიტაცია ჩაუტარდა. აქ პრობლემა საკმაოდ სერიოზული იყო, რაც ჩატარებულმა კვლევებმა აჩვენა. ავარიულობიდან გამომდინარე, აღნიშნული ხიდის რეაბილიტაცია პრიორიტეტებში პირველ ადგილზე იყო. დღეს თამამად შეგვიძლია ვთქვათ, რომ არანაირი პრობლემა აღარ არსებობს და ყველაფერი მოგვარებულია“, – განაცხადა კახა კალაძემ.
თბილისის მერიის ცნობით, რეაბილიტირებულ ხიდზე საზოგადოებრივი ტრანსპორტი უკვე ჩვეული სქემით მოძრაობს: N51 ავტობუსი და მიკროავტობუსები – N10, N30, N66, N88, N89, N100, N169, N171, N195 და N202 წერეთლის გამზირს გმირთა მოედნის გავლის ნაცვლად, ვახუშტის ხიდით უკავშირდებიან.